جىلاپ، ەڭىرەپ ءجۇرىپ كۇرەسەتىن: سمەتوۆتىڭ العاشقى باپكەرى شاكىرتىنىڭ بالا كۇنى تۋرالى ايتتى

استانا. قازاقپارات - وليمپيادا چەمپيونى ەلدوس سمەتوۆتىڭ دە، ونىڭ جەكە باپكەرى عالىمجان جىلگەلديەۆتىڭ دە ۇستازى بولعان احمەت جۇماعۇل شاكىرتتەرىنە قاتىستى ويىن ايتتى، دەپ حابارلايدى Azattyq Rýhy.

احمەت جۇماعۇلدىڭ پىكىرى Qazaqstan تەلەارناسىنىڭ Instagram جەلىسىندەگى پاراقشاسىندا جاريالاندى.

«5 جاسىندا كەلدى. ءبىر جىلدان كەيىن جاتتىعۋ جاساپ جۇرگەندە وجەتتىگى، قايتپاس قايسارلىعى بار ەكەنىن بايقادىم. جەڭىلىپ قالسا، جىلاپ، ەڭىرەپ ءجۇرىپ كۇرەسەتىن. سول ءبىر جىلدان كەيىن جارىسقا الىپ بارىپ ەدىم، جەڭىپ شىقتى. سودان ءارى قاراي كەتە بەردى.

مەنىڭ قولىمدا 10 جىلداي بولدى، ودان كەيىن ينتەرناتقا جىبەردىك. سول جەردە جەكە باپكەرى عالىمجان جىلگەلديەۆ اعاسىنىڭ قاسىندا بولدى. عالىمجان دا مەنىڭ شاكىرتىم. 3-سىنىپتان باستاپ ماعان قاتىسقان. ول دا قازاقستاندى، الەمدى (چەمپيوناتى) ۇتتى، ەۋروپا مەن ازيانى ەكى رەت ۇتتى.

قۇتتى بولسىن دەيمىز، كۇللى قازاق ەلى التىنعا قۋانىپ جاتىرمىز. كۇمىسى بار، قولاسى بار، «ءبىر التىن جەتپەي تۇر» دەپ ايتۋشى ەدى. سول ارمانىنا جەتتى، مىنەكي. بالاما راقمەت ايتامىن، قازىر مەنى «اتا» دەيدى»، - دەدى ول.

ايتا كەتەيىك، ەلدوس سمەتوۆ دزيۋدودان پاريجدەگى جازعى وليمپيادا ويىندارىنىڭ چەمپيونى اتاندى.