جەڭىل كولىكتەرمەن ۇزاق جولداردا ادام تاسۋعا شەكتەۋ قويىلۋى مۇمكىن

استانا. KAZINFORM - كولىك ءمينيسترى مارات قارابايەۆ قالالار اراسىندا قاتىنايتىن اۆتوبۋستاردى باسەكەگە قابىلەتتى ەتۋدىڭ ەكى جولىن زەرتتەپ جاتقانىن ايتتى.

«قاراساڭىزدار، ەكى قالانىڭ اراسىنا قاتىنايتىن اۆتوبۋستار 2020 -جىلدان كەيىن جوعالىپ كەتتى. ويتكەنى پاندەميا كەلدى دە كوپ كىسىلەر سيفرلىق تەحنولوگياعا ءوتتى. سونىڭ ناتيجەسىندە InDriver وتە كۇشتى بولدى دا، قازىر حالىق ەكى قالانىڭ اراسىندا قاتىنايتىن تۇراقتى اۆتوبۋستارعا بارماي جاتىر. ءبىر جاعىنان InDriver وتە ىڭعايلى. ويتكەنى ۇيىنەن الىپ كەتەدى جانە تەزىرەك جۇرەدى. وعان ەكى شارا دەپ وتىرمىز. ءبىرىنشى شارا - قازىر سەناتتا قابىلدانىپ جاتقان زاڭ. مىسالى، ءبىر نۇكتەدەن ەكىنشى نۇكتەگە دەيىن بەلگىلەنگەن جىلدامدىق ساعاتىنا شاقىرىم دەپ بەلگىلەندى دەيىك. ەكى اراعا ودان جىلدام جەتىپ قويساڭىز، سىزگە اۆتوماتتى تۇردە ايىپپۇل كەلەدى. وسىلايشا جەڭىل كولىكتەر مەن اۆتوبۋستىڭ ورتاشا جىلدامدىعى بىردەي بولادى دەپ ويلاپ وتىرمىز. سونىڭ اسەرىنەن حالىق قايتا اۆتوبۋسقا وتە مە دەگەن وي»، - دەدى ول.

مينيستر InDriver سياقتى اگرەگاتتاردىڭ قىزمەت اياسى شەكتەلۋى مۇمكىن ەكەنىن ايتىپ قالدى.

«ەكىنشى ۇسىنىس كەيبىر ەلدەردىڭ تاجىريبەسىمەن بايلانىستى. باسقا ەلدەردە InDriver سياقتى اگرەگاتتار قالالاردىڭ اراسىندا قاتىناۋعا حاقىسى جوق. مىسالى، 50 شاقىرىمنان الىس ارالىققا جولاۋشى تاسىمالداۋعا شەكتەۋ قويىلۋى مۇمكىندىك. سونداي ىستەيمىز بە دەگەن ۇسىنىس بار. بۇل ناقتى شەشىم ەمەس. ۇسىنىس قانا. InDriver ارقىلى جۇمىس ىستەپ جۇرگەن جەرگىلىكتى جىگىتتەر «تابىسىمىزدان قاعىلامىز» دەۋى مۇمكىن. بۇل بولماسا، باسقا تالاپتار قويۋىمىز كەرەك. ويتكەنى جول اپاتىنىڭ كوبى جىلدامدىقتى اسىرۋدان نەمەسە كولىك جۇرگىزۋشىنىڭ ءبىر قالادان ەكىنشى قالاعا جەتكەن سوڭ ۇيىقتاماي، تاعى دا جولعا شىعىپ كەتۋىنەن بولادى. ونى ءبىرجاقتى شەشۋ قيىن. سوندىقتان جان-جاقتى تالقىلاي وتىرىپ شەشىم قابىلدايمىز دەپ ويلايمىن»، - دەدى مارات قارابايەۆ.

اۆتور

ەسىمجان ناقتىباي