— كۇزگى-قىسقى جىلىتۋ ماۋسىمىنا قاتىستى كۇندەلىكتى ماسەلەلەردى دە ەرەكشە نازاردا ۇستاعان ءجون. قازىرگى تاڭدا بارلىق وڭىردە جىلۋ بەرۋ ماۋسىمى باستالدى. جاز ايلارىندا جابدىقتاردى، جىلۋ مەن ەلەكتر جەلىلەرىن جوندەۋ شارالارى قابىلداندى. تۇتىنۋشىلارعا جىلۋ كەستەگە سايكەس بەرىلدى. ءبىراق جىلۋدىڭ ساپاسىنا نارازى نەمەسە جىلۋسىز قالعان تۇرعىندار تاراپىنان شاعىمدار دا كەلىپ ءتۇسىپ جاتىر. ولاردىڭ ىشىندە اقتاۋ، پاۆلودار جانە پەتروپاۆل تۇرعىندارى بار، — دەدى ولجاس بەكتەنوۆ.
وسىعان وراي پرەمەر-مينيستر ءوڭىر اكىمدەرىنە جىلۋ بەرۋ ماۋسىمىنا جاۋاپتى وڭىرلىك شتابتاردىڭ جۇمىسىن كۇشەيتىپ، حالىقتىڭ ارىز- شاعىمدارىنا جەدەل ارەكەت ەتۋدى تاپسىردى.
— قىس ايلارىنداعى جۇمىستارعا اۆاريالىق بريگادالار مەن ارنايى تەحنيكانى تولىق جۇمىلدىرۋ قاجەت. سونىمەن قاتار ءوڭىر اكىمدىكتەرى حالىققا قاجەتتى كومىردىڭ تۇراقتى باعامەن قولجەتىمدى بولۋىن باقىلاۋدا ۇستاسىن. ەنەرگەتيكا مينيسترلىگى مەن ءوڭىر اكىمدىكتەرى ەنەرگيا كوزدەرىندەگى جوندەۋ جۇمىستارىن بەكىتىلگەن كەستەگە سايكەس اياقتاپ، قاجەتتى جابدىقتار رەزەرۆىن ازىرلەۋگە ءتيىس. جىلىتۋ ماۋسىمىندا حالىقتى تۇراقتى ءارى ساپالى جىلۋمەن قامتاماسىز ەتۋدى تاپسىرامىن. الەۋمەتتىك نىسانداردى ەرەكشە نازاردا ۇستاڭىزدار، — دەدى ۇكىمەت باسشىسى.
ايتا كەتەيىك، ەرلان اقكەنجەنوۆ اكىمدەرگە وڭىرلەردە كومىرگە قاتىستى جاساندى دۇربەلەڭ تۋدىرماۋدى ەسكەرتتى.