جىل باسىنان بەرى ەلىمىزدە 11 ادام قۇلدىققا ساتىلعان
استانا. KAZINFORM - جىل باسىنان بەرى ەلىمىزدىڭ 9 وڭىرىندە ادامدى قۇلدىققا ساتۋ فاكتىلەرى تىركەلگەن. بۇل تۋرالى ىشكى ىستەر مينيسترلىگىنىڭ Kazinform ساۋالىنا جولداعان جاۋابىندا ايتىلعان.
«جىل باسىنان بەرى ەڭبەككە پايدالانۋ ماقساتىمەن ادامدى باس بوستاندىعىنان زاڭسىز ايىرۋدىڭ 11 فاكتىسى تىركەلدى. ناقتى ايتساق، الماتى قالاسىنىڭ، اباي، الماتى، اقتوبە، اقمولا، پاۆلودار، ماڭعىستاۋ، قاراعاندى جانە سولتۇستىك قازاقستان وبلىستارىنىڭ پوليتسيا دەپارتامەنتتەرىندە تىركەلگەن»، - دەپ جازىلعان جاۋاپتا.
مينيسترلىك مالىمەتىندە كەيىنگى ەكى جىلدا قازاقستاندىقتاردىڭ شەتەلگە قۇلدىققا ساتىلۋ فاكتىسى تىركەلمەگەنى ايتىلعان. دەگەنمەن ونداي تالپىنىستار ءالى توقتاماي تۇر.
«پوليسيا ورگاندارى قازاقستان ازاماتتارىن وڭتۇستىك- شىعىس ازيا، وڭتۇستىك كورەيا، باحرەين، تۇركيا ەلدەرىنە شىعارىپ اكەتۋ ارەكەتتەرىنىڭ جولىن كەسىپ تۇرادى. ال قازاقستان اۋماعىندا قازاقستاندىقتار دا، ورتالىق ازيا ەلدەرىنىڭ ازاماتتارى دا قۇلدىققا ءتۇسىپ جاتادى»، - دەپ جازىلعان مينيسترلىك جاۋابىندا.