جىل باسىنان بەرى حالىق دەنساۋلىعىنا قاۋىپتى 3 مىڭعا جۋىق تاۋار انىقتالعان
ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىنىڭ ءتوراعاسى نۇرتاي سابيليانوۆ ساۋدا ساياساتىن دامىتۋ ماسەلەلەرىنە ارنالعان ۇكىمەت ساعاتىندا تاۋارلاردى سەرتيفيكاتتاۋ ءتارتىبىن قاتاڭداتۋدى ۇسىندى، دەپ حابارلايدى Kazinform.
«جىل باسىنان بەرى حالىق دەنساۋلىعىنا قاۋىپتى 3 مىڭعا جۋىق تاۋار انىقتالدى. ساراپشىلار مۇنداي تاۋارلاردىڭ باسىم بولىگىندە جالعان سەرتيفيكاتتار بار ەكەنىن ايتىپ وتىر. مينيسترلىك سايتىنىڭ (ساۋدا جانە ينتەگراتسيا مينيسترلىگى - رەد. ) مالىمەتى بويىنشا 2023 -جىلدىڭ باسىنان بەرى 22 اككرەديتتەۋ اتتەستاتى كەرى قايتارىلدى، 11 ى ۋاقىتشا توقتاتىلدى، ءونىم قاۋىپسىزدىگى تۋرالى قۇجاتتىڭ 300 دەن استامى جارامسىز دەپ تانىلدى»، - دەدى ول.
ءماجىلىس دەپۋتاتى ساۋدا سالاسىنداعى زەرتحانالار مەن ساراپشى-اۋديتورلاردىڭ قىزمەتىنە قويىلاتىن تالاپتاردى قاتاڭداتۋدى ۇسىندى.
«ساراپشىلاردىڭ پىكىرىنشە، ءبىر سەرتيفيكاتتىڭ ءوزى 100 مىڭنان استام تاۋاردى ساتۋعا مۇمكىندىك بەرەدى. ال ولاردىڭ ىشىندە ساپاسى كۇمان كەلتىرەتىندەر دە بولۋى مۇمكىن. سوندىقتان دا اككرەديتتەۋ جونىندەگى ورگاننىڭ، زەرتحانالار مەن ساراپشى-اۋديتورلاردىڭ قىزمەتىنە قويىلاتىن تالاپتاردى قاتاڭداتۋ قاجەت، سونداي-اق ولارعا باقىلاۋدى دا كۇشەيتۋ كەرەك»، - دەدى نۇرتاي سابيليانوۆ.