جىل باسىنان بەرى باس پروكۋروردىڭ ارالاسۋىمەن 4 ادام اقتالدى
استانا. KAZINFORM - قوستاناي وبلىسى التىنسارين اۋداندىق سوتىنىڭ اپەللياتسيالىق سوت القاسى وزگەرىسسىز قالدىرعان ۇكىممەن كەنجەعارين ق ك 190-بابىنىڭ 1-بولىگى بويىنشا الاياقتىق جاساعانى ءۇشىن ءبىر جىلعا باس بوستاندىعى شەكتەلدى.
اتاپ ايتقاندا، كەنجەعارين قوستاناي وبلىسى التىنسارين اۋدانىنىڭ زاڭداستىرۋ كوميسسياسىنا قۇجات تاپسىرىپ، مالايا چۋراكوۆكا اۋىلىندا ورنالاسقان پاتەردى زاڭداستىرىپ، تىركەۋگە العان.
كەيىن زاڭداستىرۋ تۋرالى شەشىم قوستاناي وبلىسىنىڭ اپەللياتسيالىق سوتىمەن زاڭسىز دەپ تانىلدى، ويتكەنى كەنجەعارين كوميسسياعا پاتەردى ساتىپ العانى جونىندە جالعان اقپارات بەرگەن.
اتالعان سوت شەشىمى كەنجەعاريندى الاياقتىق ءۇشىن قىلمىستىق جاۋاپكەرشىلىككە تارتۋعا نەگىز بولدى.
شىن مانىندە ءىس بويىنشا جاۋاپ الىنعان كۋاگەرلەر پاتەردى 1997 -جىلى بۇرىنعى يەسى كەنجەعارينگە 100 مىڭ تەڭگەگە ساتقانىن راستاعان. كەنجەعارين كۋاگەرلەردىڭ كوزىنشە اقشانى قولحاتسىز تاپسىرعان.
ساتۋشىدا پاتەردىڭ وزىنە تيەسىلى ەكەنىن راستايتىن قۇجاتتارى بولماعان، ويتكەنى ول دا ونى بۇرىنعى مەنشىك يەسىمەن اۋىزشا كەلىسىم نەگىزىندە العان.
مۇنداي جاعدايدا كەنجەعارين ازاماتتىق سوتقا شاعىمدانۋ ارقىلى مامىلەنى ورىندالدى دەپ تانۋ ارقىلى پاتەر يەسىمەن ماسەلەنى شەشۋى كەرەك ەدى.
وسىلايشا كەنجەعاريننىڭ ارەكەتىندە قىلمىس بەلگىلەرى جوق، ويتكەنى ونىڭ الاياقتىق نيەتى بولماعان.
جوعارعى سوت باس پروكۋروردىڭ كەنجەعارين مەن پاتەر ساتۋشىسى اراسىندا ازاماتتىق- قۇقىقتىق قاتىناستار تۋىنداعانى، ول قىلمىستىق قۋدالاۋدى بولدىرمايدى دەگەن نارازىلىق ۋاجىمەن كەلىستى.
باس پروكۋروردىڭ كاسساتسيالىق نارازىلىعى بويىنشا جوعارعى سوت كەنجەعاريندى اقتادى.
جالپى، ءبىرىنشى جارتىجىلدىقتا باس پروكۋروردىڭ كاسساتسيالىق نارازىلىعى بويىنشا 4 ادام اقتالدى.
سونداي-اق جازانى جەڭىلدەتۋ، ارەكەتتەردى قايتا سارالاۋ، تۇزەۋ مەكەمەسىنىڭ رەجيمىن جەڭىلدەتۋ ارقىلى 82 ادامنىڭ جاعدايى جاقساردى.