جىل باسىنان بەرى 8,7 مىڭنان استام ەتنيكالىق قازاق قانداس مارتەبەسىن الدى
استانا. قازاقپارات - 2024-جىلدىڭ 1-شىلدەدەگى جاعداي بويىنشا 8758 ەتنيكالىق قازاق تاريحي وتانىمەن تابىسىپ، قانداس مارتەبەسىن الدى.
جالپى 1991-جىلدان بەرى رەسپۋبليكاعا 1 ميلليون 137,1 مىڭ ەتنيكالىق قازاق ورالدى. جىل باسىنان قازاقستانعا كەلگەن قانداستاردىڭ جارتىسى (49,5 پايىز) قىتايدان، 34,7 پايىز- وزبەكستاننان، 5,9 پايىز - تۇرىكمەنستاننان، 5,3 پايىز - موڭعوليادان، 3,3 پايىز - رەسەيدەن جانە 1,3 پايىز باسقا ەلدەردەن كەلگەن. بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگى ءمالىم ەتتى.
2024-جىلعى 1-شىلدەدەگى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار 59 پايىزدى، ەڭبەككە قابىلەتتى جاستان كىشى 31,1 پايىزدى جانە زەينەتكەرلەر 9,9 پايىزدى قۇرايدى.
«ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 17 پايىزى جوعارى ءبىلىمدى، 23,2 پايىزى ورتا كاسىبي ءبىلىمدى، 55,2 پايىزى جالپى ورتا ءبىلىمدى، جانە 4,6 پايىزىنىڭ ءبىلىم جوق»، - دەلىنگەن حابارلامادا.
قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستاندى.
سونىمەن بىرگە، قانداستاردى قونىستاندىرۋ ءۇشىن كەلەسىدەي ەڭبەك كۇشى تاپشى وڭىرلەر انىقتالدى: اقمولا، اباي، قوستاناي، پاۆلودار، شىعىس جانە سولتۇستىك قازاقستان وبلىستارى.
قونىستاندىرۋ وڭىرلەرىندە 2024-جىلعا ارنالعان قانداستاردى قابىلداۋ كۆوتاسى 2433 ادامدى قۇرايدى. 2024-جىلعى 1-شىلدەگە جاعداي بويىنشا قونىستاندىرۋ وڭىرلەرىنە 1891 قانداس قونىس اۋداردى.
«جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى - ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 ا ە ك (258,4 مىڭ تەڭگە) مولشەرىندە؛ تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە - ءبىر جىل ىشىندە 15 تەن 30 ا ە ك (55,3 دەن 110,7 مىڭ تەڭگەگە دەيىن) مولشەرىندە بەرىلەدى»، - دەپ حابارلادى ۆەدومستۆودان.
جىل باسىنان بەرى 1579 قانداسقا ءتۇرلى قولداۋ شارالارى كورسەتىلدى. اتاپ ايتقاندا، 456 ادام تۇراقتى جۇمىسقا ورنالاستىرىلدى.
سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلداندى. تۇرعىن ءۇي ساتىپ الۋ، سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50 پايىزى نەمەسە ءبىر وتباسىنا 4,28 ميلليون تەڭگەگە دەيىن مولشەرىندە ءبىرجولعى وتەۋسىز جانە قايتارىمسىز نەگىزدە ەنگىزىلدى.
2023-جىلدان باستاپ پيلوتتىق رەجيمدە قازاقستان ەلشىلىكتەرى ارقىلى «ءبىر تەرەزە» قاعيداتى بويىنشا قانداس مارتەبەسىن بەرۋ تەتىگى ىسكە اسىرىلدى. پيلوتتىق جوبا شەڭبەرىندە ەلىمىزگە بارۋ، جۇمىس ورنى، تۇرعىن ءۇي بەرۋ مۇمكىندىكتەرى تۋرالى ماسەلەنى شەشۋگە جانە رەسپۋبليكا اۋماعىنا كىرمەي-اق قانداس مارتەبەسىن الۋعا بولادى. بۇگىنگى تاڭدا ەتنيكالىق قازاقتاردان جاڭا فورماتتا 10993 ءوتىنىش قابىلداندى.