جىل باسىنان بەرى 26 ادامنىڭ ءولىمى ماس جۇرگىزۋشىدەن بولعان
استانا. KAZINFORM - جىل باسىنان بەرى ەلىمىزدە 238 مىڭ جاياۋ جۇرگىنشى جول ەرەجەسىن بۇزىپ، ايىپپۇل ارقالاعان. بۇل تۋرالى ءى ءى م اكىمشىلىك پوليتسيا كوميتەتىنىڭ ءتوراعاسى قايسار سۇلتانبايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ءمالىم ەتتى.
«جىل باسىنان بەرى پوليتسيا 6 ميلليونعا جۋىق جول ەرەجەسىن بۇزۋ فاكتىسىن تىركەدى. ونىڭ ىشىندە 238 مىڭ جاياۋ جۇرگىنشىگە ايىپپۇل سالىندى. 12 مىڭنان استام جۇرگىزۋشى ماس كۇيىندە ۇستالىپ، قارسى جولاققا شىعۋدىڭ 5 مىڭ دەرەگى انىقتالدى. سوت 14 مىڭعا جۋىق جۇرگىزۋشىنى كولىك ايداۋ قۇقىعىنان ايىردى. 12 مىڭنان استام زاڭ بۇزۋشى اكىمشىلىك قاماۋعا الىندى»، - دەدى قايسار سۇلتانبايەۆ.
ونىڭ سوزىنشە، جىل باسىنان بەرى ماس جۇرگىزۋشىلەردىڭ كىناسىنەن 178 جول اپاتى بولىپ، سالدارىنان 26 ادام قازا تاپقان.
كوميتەت باسشىسى اۆتومەكتەپتەرگە قويىلاتىن تالاپتاردىڭ تومەن ەكەنىن اتاپ ءوتتى.
«ولاردىڭ قىزمەتىنە مەملەكەتتىك باقىلاۋ بولماۋىنا بايلانىستى جۇرگىزۋشىلەردى دايارلاۋدىڭ ساپاسى تۋرالى ايتۋدىڭ قاجەتى جوق»، - دەدى ول.
اۆتور
ەسىمجان ناقتىباي