ىشكى ىستەر مينيسترلىگى جاسوسپىرىمدەر مەن جاستاردى قىلمىستىق ورتاعا تارتۋدىڭ الدىن الۋ جۇمىستارىن جالعاستىرىپ جاتىر. نەگىزگى نازار قاۋىپ-قاتەردى ەرتە انىقتاۋعا، بوپسالاۋعا جانە قىلمىستىق يدەولوگيانىڭ تارالۋىنا جول بەرمەۋگە اۋدارىلعان.
وقۋشىلار مەن ستۋدەنتتەردى بوپسالاۋدان قورعاۋ باعىتىندا دا ناقتى شارالار قابىلداندى. كامەلەتكە تولماعاندارعا قاتىستى وسىنداي قىلمىستار جاساعان ءتورت توپتىڭ ارەكەتىنە توسقاۋىل قويىلدى.
بۇدان بولەك، پوليتسيا جاستاردى زاڭسىز ارەكەتتەرگە تارتۋعا تىرىساتىن ۇيىمداسقان قىلمىستىق توپتارعا قارسى كۇرەس جۇرگىزىپ جاتىر. جىل باسىنان بەرى مۇنداي توپتارعا قاتىستى 47 قىلمىستىق ءىس قوزعالدى. قىلمىستىق توپتاردىڭ 240-تان استام مۇشەسى جاۋاپقا تارتىلىپ جاتىر.
- پروفيلاكتيكالىق جۇمىستارمەن قاتار جاستارعا كەرى ىقپال ەتەتىن ادامدار مەن توپتاردىڭ قىزمەتىن توقتاتۋ شارالارى قابىلدانىپ جاتىر. بۇل شارالار قىلمىستىق قاۋىپ-قاتەردى ۋاقتىلى انىقتاۋعا، قۇقىققا قايشى ارەكەتتەردىڭ جولىن كەسۋگە جانە جاستاردى قىلمىستىق ىقپالدان قورعاۋعا مۇمكىندىك بەرەدى، - دەدى ءى ءى م ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
مينيسترلىك بۇل باعىتتاعى جۇمىستى ءبىلىم بەرۋ ۇيىمدارىمەن، اتا-انالارمەن جانە قوعاممەن بىرلەسىپ جالعاستىرادى. باستى ماقسات - قۇقىق بۇزۋشىلىقتىڭ الدىن الا كەزەڭدە جولىن كەسىپ، «زاڭ مەن ءتارتىپ» قاعيداتى اياسىندا وسكەلەڭ ۇرپاق ءۇشىن قاۋىپسىز ورتا قالىپتاستىرۋ.
وسىعان دەيىن ىشكى ىستەر مينيسترلىگى جاسوسپىرىمدەر قىلمىسىنىڭ الدىن الۋ جۇمىستارى كۇشەيتىلەتىنى تۋرالى حابارلاعان بولاتىن.