جوتەلىپ، ىستىعى كوتەرىلگەندەر نەگە ۇزاق ۋاقىت جازىلا الماي جاتىر - مينيستر جاۋابى

استانا. KAZINFORM - دەنساۋلىق ساقتاۋ ءمينيسترى اقمارال ءالنازاروۆا جوتەل جۇقتىرعان قازاقستاندىقتاردىڭ نەگە ۇزاق ۋاقىت بويى جازىلا الماي جاتقانىن ءتۇسىندىردى.

«حالىق اراسىندا دەنە قىزۋىنىڭ 39 گرادۋستان تۇسپەي، 2 اپتادان 3 ايعا دەيىن جوتەل كەتپەيتىن اۋرۋدىڭ تاراپ جاتقانى تۋرالى شاعىمدار بار. بۇرىن 4-5 كۇندە كەتىپ قالاتىن سيمپتومداردىڭ ۇزاققا سوزىلىپ كەتۋىنە نە سەبەپ؟» - دەپ سۇرادى جۋرناليست ۇكىمەت وتىرىسىنان كەيىن ءوتىپ جاتقان باسپا ءسوز ءماسليحاتىندا.

اقمارال ءالنازاروۆا ونىڭ ءبىر سەبەبى حالىقتىڭ ءدارى-دارمەكتى بەيبەرەكەت پايدالانۋىندا بولۋى مۇمكىن دەگەن بولجام ايتتى.

«بۇل جەردە كەشەندى ماسەلەلەر بار دەپ ويلايمىن. ۇلكەن ماسەلەنىڭ ءبىرى - ۆيرۋستاردىڭ انتيبيوتيكتەرگە توزىمدىلىگى. بۇكىل الەمدە وسىنداي ماسەلە بار. وكىنىشكە قاراي، انتيبيوتيكتەردى باقىلاۋسىز پايدالانۋ ماسەلەسى بۇكىل الەمدە وزەكتى بولىپ تۇر. ءقازىر جاس بالالاردىڭ اۋىر جاعدايمەن اۋرۋحاناعا ءتۇسىپ، ەشقانداي انتيبيوتيكپەن، 4-5 بەسىنشى قاتارداعى انتيبيوتيكتەرمەن ەمدەلمەي جاتقانىن كورىپ وتىرمىز»، - دەدى مينيستر.

سونداي-اق، ول جاستاردىڭ دۇرىس تاماقتانباۋى دەنساۋلىعىنان كورىنىس بەرىپ جاتقانىن ايتادى.

«ەكىنشى ماسەلە - قانشا دەگەنمەن، دۇرىس تاماقتانۋ ماسەلەسى شىعار. ءقازىر، وكىنىشكە قاراي، اسىرەسە جاستار جاعى سونشا ءبىر ساپالى تاماق ءىشىپ جۇرگەن جوق. بۇل دا ءبىزىڭ يممۋنيتەتىمىزدى قالىپتاستىرادى. ۇزاق ۋاقىت بويى اۋرۋدىڭ تاعى ءبىر سەبەبى وسىندا بولۋى دا مۇمكىن. ءۇشىنشى ماسەلە قالاداعى كولىكتەردى سانى بولۋى مۇمكىن. اللەرگيالىق رينيتتەر مەن سينۋسيتتەر دە اسىرەسە قالا حالقىنىڭ دەنساۋلىعىنا اسەر ەتىپ جاتۋى مۇمكىن. سوندىقتان بۇل ماسەلەنى كەشەندى تۇردە قاراۋ كەرەك»، - دەدى دەنساۋلىق ساقتاۋ ءمينيسترى.

اۆتور
ەسىمجان ناقتىباي