تىك ۇشىپ-قونىپ، ەلەكتر قۋاتىمەن قوزعالاتىن (eVTOL) سەريالىق اۋە اپپاراتى «Future Games 2026» حالىقارالىق تۋرنيرى اياسىندا ەلورداداعى ارنايى رۇقسات ەتىلگەن اۋماقتا سىناق ۇشۋىن ورىندادى.
دەمونستراتسيالىق ۇشۋ بارىسىندا قاتىسۋشىلار ۇشقىشسىز اۋە جۇيەلەرىنىڭ ناقتى جاعدايدا قولدانىلۋ مۇمكىندىكتەرىمەن تانىستى. EH216-S ەكى جولاۋشىنى تاسىمالداۋعا ارنالعان. ونىڭ ەڭ جوعارى جىلدامدىعى ساعاتىنا 130 شاقىرىمدى، ال ۇشۋ قاشىقتىعى 35 شاقىرىمعا دەيىن جەتەدى.
«العاشقى كەزەڭدە قازاقستاننىڭ تابيعي، مادەني جانە تاريحي كورىكتى جەرلەرى ۇستىمەن ۇزاقتىعى 5- 30 مينۋت بولاتىن دەمونستراتسيالىق جانە تۋريستىك باعىتتاردى ىسكە قوسۋ جوسپارلانىپ وتىر»، - دەپ حابارلادى مينيسترلىك.
ۆەدومستۆونىڭ مالىمەتىنشە، بولاشاقتا مۇنداي ۇشقىشسىز جولاۋشىلار اۋە جۇيەلەرى قولدانىستاعى كولىك تۇرلەرىن تولىقتىرىپ، ەلىمىزدىڭ زاماناۋي كولىك ينفراقۇرىلىمىنىڭ ءبىر بولىگىنە اينالادى.
جوبا اياسىندا ۇشقىشسىز اۋە جۇيەلەرىن شۇعىل مەديتسينالىق كومەك كورسەتۋگە، ءدارى-دارمەك جەتكىزۋگە، ءورت ءسوندىرۋ جۇمىستارىنا، لوگيستيكاعا جانە جەدەل ارەكەت ەتۋدى قاجەت ەتەتىن وزگە دە سالالاردا پايدالانۋ كوزدەلىپ وتىر.
سونىمەن قاتار قازاقستاندا جولاۋشىلارعا ارنالعان ۇشقىشسىز اۋە جۇيەلەرىن كەزەڭ-كەزەڭىمەن جەرگىلىكتى جەردە ءوندىرۋ جوسپارلانعان. بۇل جوعارى تەحنولوگيالى ماشينا جاساۋ سالاسىن دامىتۋعا، جاڭا جۇمىس ورىندارىن اشۋعا جانە ونەركاسىپتىك كووپەراتسيانى كەڭەيتۋگە مۇمكىندىك بەرەدى.
«قازىرگى تاڭدا كولىك مينيسترلىگى مۇددەلى مەملەكەتتىك ورگاندارمەن بىرلەسىپ، قالالىق اۋە موبيلدىگىن دامىتۋ ءۇشىن قاجەتتى قۇقىقتىق جانە ينفراقۇرىلىمدىق نەگىزدى قالىپتاستىرۋ جۇمىستارىن جۇرگىزۋدە»، - دەلىنگەن حابارلامادا.