قازاقستان حالىق كەڭەسىنىڭ مۇشەسى، «جاستار» عىلىمي-زەرتتەۋ ورتالىعىنىڭ ديرەكتورى نايلا مۇحتاروۆا وسىنداي پىكىر ءبىلدىردى.
ونىڭ ايتۋىنشا، پرەزيدەنت جولداۋدا جاستارعا قولداۋ ءبىلدىرىپ قانا قويماي، ەل دامۋىنا بەلسەندى اتسالىسۋدى جانە ءار ازاماتتىڭ ءوز جاۋاپكەرشىلىگىن سەزىنۋىن تالاپ ەتەتىن ناقتى مىندەتتەردى ايقىندادى.
جولداۋداعى باسىم باعىتتاردىڭ ءبىرى - حالىققا قولجەتىمدى سيفرلىق ەكونوميكانى دامىتۋ. نايلا مۇحتاروۆانىڭ پىكىرىنشە، ينتەرنەت تەك كوڭىل كوتەرىپ، اقپارات تۇتىناتىن ورتا بولىپ قالماۋى كەرەك. ول ەڭبەك ەتىپ، كاسىپ اشۋعا جانە جاڭا ءونىم جاساۋعا مۇمكىندىك بەرەتىن كەڭىستىككە اينالۋعا ءتيىس.
- سمارتفون ۋاقىتتى بوسقا وتكىزەتىن قىمبات ويىنشىق ەمەس، ادال تابىس تابۋدىڭ قۇرالى بولۋى ءتيىس، - دەدى ساراپشى.
ول ۇكىمەتتىڭ جىل سوڭىنا دەيىن تسيفرلىق جۇمىسپەن قامتۋدى جەڭىلدەتەتىن ارنايى قۇقىقتىق رەجيم ازىرلەۋ جوسپارىنا دا نازار اۋداردى. بۇل باستاما فريلانس، ينتەرنەت ارقىلى ساۋدا جاساۋ، سيفرلىق پلاتفورمالاردا جۇمىس ىستەۋ جانە كونتەنت ءوندىرۋ سالالارىنداعى قىزمەتتى رەتتەپ، وعان قاتىسۋشىلار ءۇشىن تۇسىنىكتى ءارى قولايلى جاعداي قالىپتاستىرۋعا مۇمكىندىك بەرەدى.
ساراپشىنىڭ پايىمداۋىنشا، مۇنداي جۇمىس تۇرلەرى قازىرگى جاستاردىڭ ءومىر سالتىنا ساي كەلەدى. سونىمەن قاتار كاسىبي قابىلەتىن شىڭداپ، ەڭبەك نارىعىندا ءوز ورنىن تابۋىنا جول اشادى.
- جولداۋداعى تاعى ءبىر ماڭىزدى وي - ادامنىڭ مۇمكىندىگى ونىڭ قاي جەردە تۇراتىنىنا بايلانىستى بولماۋعا ءتيىس. اۋىلداعى جاس قالاداعى قۇرداسىمەن بىردەي باسەكەگە تۇسە الۋى كەرەك، - دەيدى نايلا مۇحتاروۆا.
ونىڭ سوزىنشە، بۇل ءۇشىن اۋىل شارۋاشىلىعى ونىمدەرىن وتكىزۋدىڭ تسيفرلىق ارنالارىن دامىتۋ، ينفراقۇرىلىمدى جاڭعىرتۋ، ەلدى مەكەندەردى گازبەن جانە ساپالى اۋىزسۋمەن قامتاماسىز ەتۋ ماڭىزدى.
اتاپ ايتقاندا، اۋىل وندىرۋشىلەرىنىڭ ءونىمىن سيفرلىق پلاتفورمالار ارقىلى ساتۋعا باعىتتالعان پيلوتتىق جوبالار مەن «حالىقتىق قۇرىلىس» باعدارلاماسى اياسىندا ينفراقۇرىلىمدى دامىتۋ وڭىرلەردىڭ ەكونوميكالىق الەۋەتىن ارتتىرۋعا ىقپال ەتەدى.
ساراپشى مۇنىڭ ارقاسىندا جاستار تۋعان جەرىندە دە ءوز قابىلەتىن ىسكە اسىرىپ، بولاشاعىن قالىپتاستىرۋعا مۇمكىندىك الاتىنىن اتاپ ءوتتى.
نايلا مۇحتاروۆا جاستاردى ەڭبەككە تارتۋ ماسەلەسىنە دە توقتالدى. ونىڭ ايتۋىنشا، وقىمايتىن دا، جۇمىس ىستەمەيتىن دە جاستاردىڭ ۇلەسى ازايعانىمەن، بۇل باعىتتاعى ماسەلە ءالى دە وزەكتى.
ساراپشى كەلتىرگەن دەرەككە سايكەس، 2026-جىلدىڭ ەكىنشى توقسانىندا مۇنداي جاستاردىڭ ۇلەسى 5,7 پايىزدى قۇراعان. بۇل كورسەتكىشتىڭ ارتىندا 300 مىڭنان استام جاس تۇر.
- سيفرلىق ەڭبەك ولاردىڭ كوبى ءۇشىن ەڭبەك نارىعىنا قايتا ورالۋدىڭ ەڭ قولجەتىمدى جولى بولۋى مۇمكىن. ارينە، كەز كەلگەن مۇمكىندىك جاۋاپكەرشىلىكپەن قاتار جۇرەدى، - دەدى ول.
ساراپشىنىڭ پىكىرىنشە، «ادال ازامات» قۇندىلىقتارى كۇندەلىكتى ومىردە دە، قوعامنىڭ سيفرلىق وزگەرىستەرگە بەيىمدەلۋى كەزەڭىندە دە ماڭىزىن جوعالتپايدى.
- جولداۋ جاستارعا ايقىن باعىت-باعدار بەردى. ەندىگى ورتاق مىندەتىمىز - بەرىلگەن مۇمكىندىكتەردى ناقتى ىسكە اينالدىرىپ، ءار جاستىڭ ءوز الەۋەتىن تولىق اشۋىنا جاعداي جاساۋ، - دەپ تۇيىندەدى نايلا مۇحتاروۆا.
ەستەرىڭىزگە سالا كەتەيىك، 28-قازاندا مەملەكەت باسشىسى قازاقستان حالقىنا جىل سايىنعى جولداۋىن جاريالادى.