الايدا قازاقستاندا اۆتوماگيسترالدەردە ارنايى بەلگىلەنگەن ورىنداردان تىس جەردە توقتاۋعا تىيىم سالىنادى. بۇل تالاپتى بۇزۋ جۇرگىزۋشى مەن جولاۋشىلاردىڭ ومىرىنە قاۋىپ ءتوندىرۋى مۇمكىن.
قازاقستاننىڭ جول ءجۇرىسى قاعيدالارىنا سايكەس، اۆتوماگيسترالدەردە «تۇراق ورنى» نەمەسە «دەمالىس ورنى» بەلگىلەرىمەن بەلگىلەنگەن الاڭداردان باسقا جەرلەردە توقتاۋعا بولمايدى. بۇل تالاپ «اۆتوموبيلدەرگە ارنالعان جول» بەلگىسى ورناتىلعان جولدارعا دا قاتىستى. بۇل تۋرالى «قازاۆتوجول» ۇلتتىق كومپانياسىنىڭ باسپا ءسوز قىزمەتى حابارلادى.
نەلىكتەن جول جيەگىندە توقتاۋ قاۋىپتى؟
اۆتوماگيسترالدەردە كولىكتەر جوعارى جىلدامدىقپەن قوزعالادى. اسىرەسە قاراڭعىدا، جاڭبىر نەمەسە قار جاۋعان كەزدە جول جيەگىندە تۇرعان اۆتوموبيلدى دەر كەزىندە بايقاۋ قيىن. كولىك اعىنىنا قاراعان جاقتان ءتۇسۋ نەمەسە ءجۇرىس بولىگىنە جاقىن تۇرۋ دا قاۋىپتى جاعدايعا اكەلۋى مۇمكىن.
سوندىقتان ۇزاق ساپارعا شىققاندا دەمالىس ۋاقىتىن الدىن الا جوسپارلاپ، ارنايى تۇراقتار مەن دەمالىس الاڭدارىن تاڭداعان ءجون.
جولدا امالسىز توقتاۋعا تۋرا كەلسە، نە ىستەۋ كەرەك؟
جۇرگىزۋشىلەرگە مىنا قاۋىپسىزدىك تالاپتارىن ساقتاۋ ۇسىنىلادى:
اۆاريالىق جارىق سيگنالىن قوسىڭىز. مۇمكىندىك بولسا، كولىكتى ءجۇرىس بولىگىنەن بارىنشا قاۋىپسىز جەرگە شىعارىڭىز.
اۆاريالىق توقتاۋ بەلگىسىن قويىڭىز. ەلدى مەكەننەن تىس جەردە بەلگى كولىكتەن كەمىندە 30 مەتر قاشىقتىقتا ورنالاسۋى كەرەك. ول باسقا جۇرگىزۋشىلەرگە انىق كورىنۋى ءتيىس.
جارىق شاعىلىستىراتىن كەۋدەشە كيىڭىز. كولىكتەن شىعاردا اباي بولىپ، مۇمكىندىك بولسا، قوزعالىس اعىنىنا قاراما-قارسى جاقتاعى ەسىكتى پايدالانىڭىز. سودان كەيىن جولدان قاۋىپسىز قاشىقتىققا، قورشاۋدىڭ ارعى جاعىنا ءوتىڭىز.
قوزعالىس جولاقتارىن كەسىپ وتپەڭىز. قاۋىپسىزدىك ءۇشىن جولدىڭ ءجۇرىس بولىگىندە جۇرمەڭىز.
قاجەت بولسا، كومەككە حابارلاسىڭىز. شۇعىل جاعدايدا 112 نومىرىنە قوڭىراۋ شالۋعا بولادى. رەسپۋبليكالىق ماڭىزى بار اۆتوموبيل جولدارىنداعى جاعداي تۋرالى 1403 بايلانىس ورتالىعىنان اقپارات الۋعا بولادى.
ەسكە سالايىق، بۇعان دەيىن پرەمەر-مينيستر ولجاس بەكتەنوۆ كامەرالاردى كولىك جۇرگىزۋ كەزىندە تەلەفونعا تەلمىرگەن جۇرگىزۋشىلەردى انىقتاۋعا باعىتتاۋدى تاپسىرعان ەدى.