جول ساپاسىن جاساندى ينتەللەكت ارقىلى انىقتاۋعا بولادى

استانا. KAZINFORM - ەلدەگى جولداردىڭ ءجاي-جاپسارىن جاساندى ينتەللەكت ارقىلى بىلۋگە بولادى. ۇلتتىق ساپا ورتالىعى ويلاپ تاپقان SRDS باعدارلاماسى تراسساداعى 8 اقاۋدى انىقتايدى. ياعني، اسفالت جابىندىسىنىڭ بەرىكتىگى مەن وي-شۇقىرى تۋرالى اۆتوماتتى تۇردە اقپارات جيناۋعا مۇمكىندىك بار. وسىعان ۇقساس جۇيە امەريكا مەن ەۋروپادا كەڭىنەن پايدالانىلادى. ال، ورتالىق ازيادا العاش بولىپ اقىلدى قۇرىلعىعا يە بولعان قازاقستان عانا.

بۇرىن ينجەنەرلەر 100 شاقىرىم جولدىڭ ساپاسىنا دياگنوستيكا جاساۋ ءۇشىن ءتورت كۇن جوعالتاتىن. قازىر بۇل ءىس ءتورت ساعاتتا بىتەدى.

اينالاسى بەينەكامەراعى تولى كولىكتەر جولدىڭ كەدىر-بۇدىرىن بىردەن سەزەدى. ال، جاساندى ينتەللەكت بىرنەشە ميلليسەكۋندتا اقاۋدىڭ كولەمى مەن كوورديناتىن شىعارادى. قۇرىلعىنىڭ ارتىقشىلىعى كوپ ورىندى قاجەت ەتپەيتىنىندە. ينجەنەرلەر ونى كەز-كەلگەن كولىككە جارتى ساعاتتا ورناتاتىن كورىنەدى.

- ءجۇرىس داتچيكتەرى بار. بۇل جولدىڭ ناقتى شاقىرىمىن كورسەتەدى. كەيىن كولدەنەڭ نەمەسە تەگىس ەكەنىن انىقتايتىن جادناماعا سول اقپاراتتى جىبەرەدى. ال، وسىنىڭ ءبارىن جاساندى ينتەللەكت بىرىكتىرەدى. قۇرىلعىنىڭ باستى قۇرالى بەينەكامەرالار. ول جولداعى اقاۋلاردى انىقتايدى. توقەتەرىن ايتقاندا قوسىمشا داتچيكتەردىڭ ءبارى وسى كامەرانىڭ كومەكشىسى، - دەيدى «جول اكتيۆتەرى ساپاسىنىڭ ۇلتتىق ورتالىعى» ر م ك ينجەنەرلەرى.

ازىرگە قولدا بار كامەرانىڭ ءتۇسىرۋ كولەمى از. ءبىر عانا جولاقتى قامتي الادى. باعدارلاما ىسكە قوسىلعاندا كولىك تە جىلدامدىعىن ازايتۋى كەرەك.

جاساندى ينتەللەكت SRDS-كە كورشى ەلدەردەن قۇداپ ءتۇسىپ جاتقاندار كوپ. اسەرەسى بۇل جۇيەگە رەسەيلىك ينجەنەرلەر اۋەس. پاتەنت ۇلتتىق ساپا ورتالىعىنىڭ ەنشىسىندە بولعاندىقتان قىزىققاندار كەلىپ ساتىپ الۋدا. ال، مۇنداي قۇرىلعى ەلىمىزدىڭ 16 وڭىرىندە بار. ولار 2 ايدا 14000 شاقىرىم جولعا مانيتورينگ جۇرگىزگەن.

- ءار ايماقتىڭ ءوز مونيتورينگتىك الاڭدارى بار. ءبىز سولاردى ورتالىق بازادان وڭدەپ، 100 مەتر سايىن اقاۋلار بار- جوعىن تەكسەرىپ شىعامىز. بۇرىن ءاربىر بەلگىنى ءوز قولىمىزبەن سىزىپ شىعاتىنبىز. ينجەنەر كەيبىر ساتتەردى بايقاماي قالۋى دا مۇمكىن ەدى. ال، بۇل جۇيە ارقىلى تاۋەكەلدەر ازايدى. ونىڭ ۇستىنە ادامي فاكتر از بولعاندىقتان، جەمقورلىققا جول بەرىلمەيدى، - دەيدى ورتالىق ساراپشىلارى.

جالپى، ەلىمىزدەگى جول قۇرىلىسىندا جاڭا تەحنولوگيالار كەڭ ەتەك الىپ كەلەدى. SRDS سونىڭ ايقىن دالەلى. ەندى وتاندىق IT ماماندار اسفالت جابىنىن عانا ەمەس، ءاربىر قاباتىنا دەيىن مانيتورينگ جۇرگىزە الاتىن جۇيە قۇراستىرۋعا كىرىسكەن. ازىرگە الەمدە ونداي باعدارلاما جوق. 

ايتا كەتەيىك، بۇعان دەيىن ۇكىمەت باسشىسى ەلدەگى جول ساپاسىن سىناعان بولاتىن.

التىنبەك ءاميت