جول ەرەجەسىن بۇزعاندارعا ساقتاندىرۋ اقىسى ارتادى، ۇقىپتى جۇرگىزۋشىلەرگە جەڭىلدىك جاسالادى

استانا. KAZINFORM - قازاقستاندا جول ءجۇرۋ ەرەجەسىن بۇزعانداردىڭ ساقتاندىرۋ پوليسى ۇلعايادى، ال ۇقىپتى جۇرگىزگەندەرگە قوسىمشا جەڭىلدىكتەر بەرىلمەك. ق ر قارجى نارىعىن رەتتەۋ جانە دامىتۋ اگەنتتىگى «قازاقستان رەسپۋبليكاسىنىڭ كەيبىر نورماتيۆتىك قۇقىقتىق اكتىلەرىنە ساقتاندىرۋ قىزمەتىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» اگەنتتىك باسقارماسىنىڭ قاۋلى جوباسىن ازىرلەدى.

قۇجاتتا ۇسىنىلعان باستى وزگەرىستەر مىندەتتى اۆتوكولىك ساقتاندىرۋى بويىنشا «بونۋس-مالۋس» جۇيەسىن جەتىلدىرۋگە قاتىستى بولماق. بۇل جۇيە كليەنتتىڭ ساقتاندىرۋ جاعدايلارىنا قاراي تولەم قۇنىن ەسەپتەۋدە قولدانىلادى. ەش اپاتسىز ءجۇرۋ كەزىندە «بونۋس-مالۋس» كلاسسى ارتادى جانە كليەنت كىناسىنەن اپات بولعان جاعدايدا تومەندەيدى. تيىسىنشە، «بونۋس-مالۋس» كلاسسى نەعۇرلىم جوعارى بولسا، ساقتاندىرۋ قۇنى سوعۇرلىم ارزان بولادى.

قازىرگى «بونۋس-مالۋس» جۇيەسى قازاقستاندا 2007 -جىلدان بەرى قولدانىستا جانە 15 كلاسستان (13 نەگىزگى جانە «0» مەن «م» كلاسستارى) تۇرادى.

«اگەنتتىك «بونۋس-مالۋس» جۇيەسىن 15 تەن 18 سىنىپقا دەيىن كەڭەيتۋدى ۇسىنادى جانە جاڭا «م1» جانە «م2» كلاسستارى قوسىلادى، ولار جول-كولىك وقيعالارىنا ءجيى تاپ بولاتىن جۇرگىزۋشىلەرگە قولدانىلادى. بۇل سىنىپتار ءبىر جىلدا 3 جانە ودان دا كوپ جول-كولىك وقيعاسىن جاساعان جاعدايدا قولدانىلادى. ەڭ جوعارى «13» سىنىپتا كوتەرىلگەن، بەس جىلدان استام ۋاقىت بويى جول اپاتىنا ۇشىراماعان ۇقىپتى جۇرگىزۋشىلەر ءۇشىن ساقتاندىرۋ قۇنى تومەندەتىلەدى»، - دەپ ءتۇسىندىردى اگەنتتىكتەن.

«بونۋس-مالۋس» جۇيەسىندە ساقتاندىرۋ جاعدايلارىنىڭ سانىن عانا ەمەس، كەلتىرىلگەن زالالدىڭ اۋىرلىعىن دا ەسكەرۋ ماڭىزدى جاڭالىق بولىپ وتىر.

«بۇل بۇرىننان بار جۇيە، تەك جول- كولىك وقيعاسىنىڭ اۋقىمىنا نازار اۋدارۋ كەرەك. ەگەر ساقتاندىرۋ كومپانياسى وتەيتىن شىعىن مولشەرى 200 ا ە ك-تەن (2024 -جىلى 738400 تەڭگە) از بولسا، بۇل «بونۋس-مالۋس» جۇيەسىنە كوپ اسەر ەتپەيدى. ال ەگەر شىعىن كولەمى شەكتىك سوماعا جەتسە، وندا كەلەسى جولى پوليس راسىمدەيتىن سوماسى ەكى ەسەگە وسەدى. جۇرگىزۋشى ۇزاق جىلدار بويى زاڭ بۇزباسا، وندا وعان تاعى قوسىمشا جەڭىلدىك بەرىلەدى»، - دەپ ءتۇسىندىردى قازاقستان ساقتاندىرۋشىلار قاۋىمداستىعىنىڭ ءتوراعاسى ۆيتاليي ۆەريەۆكين.

جاڭا جۇيە كولىك جۇرگىزۋ كەزىندە جول قوزعالىسى ەرەجەلەرىن ساقتاۋدى دا ەسكەرەدى. جكو جاساعان جۇرگىزۋشىدە مىسالى، جىلدامدىقتى 40 كم/ساعاتتان اسىرعانى، قوزعالىستىڭ قارسى باعىتىنا شىعىپ كەتكەنى نەمەسە اۆاريالىق جاعداي تۋعىزعانى ءۇشىن ايىپپۇلدارى بولسا، وندا كەلەسى ساقتاندىرۋ كەلىسىم-شارتىن جاساعاندا ونىڭ «بونۋس-مالۋس» كلاسسى اۆتوماتتى تۇردە تومەندەيدى. سونىمەن قاتار، اكىمشىلىك جانە قىلمىستىق قۇقىقبۇزۋشىلىقتار تەك ساقتاندىرۋ كەزەڭىندە، ياعني جىل ىشىندە ءۇش جانە ودان دا كوپ جول قوزعالىسى ەرەجەلەرىن بۇزعاندا عانا ەسكەرىلەدى.

مۇنداي تاجىريبە الەمنىڭ كوپتەگەن ەلدەرىندە جۇرگىزۋشىلەردى ۇقىپتى جۇرگىزۋگە جانە كولىك جۇرگىزۋ ەرەجەلەرى مەن مادەنيەتىن ساقتاۋعا ىنتالاندىرۋ ءۇشىن قولدانىلادى. سونداي-اق، «بونۋس-مالۋس» جۇيەسىن ساقتانۋشىنىڭ نەمەسە ساقتاندىرىلعان ادامنىڭ قاتىسۋىمەن كولىك جۇرگىزەتىن جۇرگىزۋشىلەرگە، سونىڭ ىشىندە كارشەرينگكە تاراتۋ ۇسىنىلعان.

جوبانىڭ تولىق ماتىنىمەن اشىق نورماتيۆتىك قۇقىقتىق اكتىلەردىڭ «اشىق ن ق ا» ينتەرنەت-پورتالىنان جانە اگەنتتىكتىڭ رەسمي ينتەرنەت- رەسۋرسىنان «نورماتيۆتىك قۇقىقتىق بازا» بولىمىندە تانىسۋعا بولادى.

اۆتور
ايجان سەرىكجان قىزى