جول بويىنداعى اسحانادا ۇيىقتاعان قوس پوليتسەي جۇمىستان قۋىلدى

قىزىلوردا. KAZINFORM - قىزىلوردادا جول بويىنداعى اسحانادا قىزمەتتىك كيىممەن ۇيىقتاعان قوس پوليتسەي جۇمىستان قۋىلدى.

وبلىستىق سوتتىڭ باسپا ءسوز قىزمەتى حابارلاعانداي، وقيعا بىلتىر 23 -مامىردا بولعان. جەرگىلىكتى پوليتسيا قىزمەتى باسقارماسى پاترۋلدىك پوليتسيا روتاسىنىڭ بۇرىنعى ينسپەكتورلارى «سامارا-شىمكەنت» اۆتوجولىندا كەزەكشىلىك اتقارعان. ءبىراق سول كۇنى الەۋمەتتىك جەلىگە جول بويىنداعى اسحانا جانىندا پاترۋلدىك پوليتسيا روتاسىنىڭ قىزمەتتىك كولىگى تۇرعانى، اسحانا ىشىندە ەكەۋىنىڭ قىزمەتتىك كيىممەن ۇيىقتاپ جاتقانى تۋرالى بەينەجازبا جاريالانعان.

- قىزمەتتىك تەرگەۋ قورىتىندىسىنا سۇيەنسەك، ولار قىزمەتتىك مىندەتىنە سالعىرت قاراعان. كوپشىلىك جەردە نىساندىق كيىممەن ۇيىقتاپ، پوليتسيا يميدجىنە كىر كەلتىرەتىن رەزونانستىق بەينەجازبانىڭ تارالۋىنا جول بەرگەن. پورتاتيۆتى بەينەجەتونعا كەزەكشىلىك بارىسىن تولىق تۇسىرمەي، نەگىزسىز ءسوندىرىپ قويعان. پوليتسيا قىزمەتكەرلەرىنىڭ اتىنا كىر كەلتىرەتىن ارەكەتى ءۇشىن ولار ىشكى ىستەر ورگاندارى قاتارىنان شىعارىلدى، - دەلىنگەن ۆەدومستۆو حابارلاماسىندا.

الايدا، بۇرىنعى پوليتسەيلەر وزدەرىنە تارتىپتىك جازا قولدانۋ تۋرالى بۇيرىقتىڭ كۇشىن جويۋدى، بۇرىنعى لاۋازىمىنا قايتا ورنالاستىرۋدى سۇراپ قىزىلوردا قالالىق سوتىنا جۇگىنگەن. سوت ولاردىڭ تالاپ ارىزىن قاناعاتتاندىرعان جوق.

ال جىل باسىندا ورالدا سوتقا قۇرمەتسىزدىك تانىتقان پوليتسيا قىزمەتكەرى جاۋاپقا تارتىلدى.

اۆتور

نازەركە سانيازوۆا