جول اپاتىنا تۇسكەن سوڭ «اقىلدى سومكە» ويلاپ تاپقان 12 جاستاعى ايتۋار
استانا. KAZINFORM - ايتۋارعا «اقىلدى سومكە» جاساۋ يدەياسى مۇقتاجدىقتان تۋىنداعان. تۇركىستان وبلىسى، ورداباسى اۋدانىنا قاراستى تورتكۇل اۋىلىندا ەرەكشە سومكە جاساپ، تالايدى تاڭداي قاقتىرعان وقۋشى تۇرادى. ول جاساپ شىعارعان «اقىلدى سومكەنىڭ» وزگە سومكەلەردەن ايىرماشىلىعى - ونى پۋلتپەن باسقارىپ، جۇرگىزۋگە بولادى.
ايتۋار سوۆەتبەك - شىمكەنت قالاسىنىڭ تۋماسى، كەيىن وتباسىمەن بىرگە اۋىلعا كوشكەن. 3 قىزدان كەيىن دۇنيەگە كەلگەن ايتۋار - بۇگىندە تورتكۇل جالپى ورتا مەكتەبىندەگى وزات وقۋشىلاردىڭ ءبىرى.
اناسى ءارى سىنىپ جەتەكشىسى نۇرگۇل ءابدراش قىزىنىڭ ايتۋىنشا، ايتۋارعا «اقىلدى سومكە» جاساۋ يدەياسى مۇقتاجدىقتان تۋىنداعان.
«وتباسىمىز ءۇشىن وتە اۋىر جاعدايدى باستان كەشتىك. انا رەتىندە مۇنى دۇشپانىما دا تىلەمەيمىن. ەكى جىل بۇرىن ايتۋارمەن جول اپاتىنا تۇستىك. بالامدا اشىق جاراقات بولماعانىمەن، ىشكى اعزاسى زاقىمدانعان. ياعني، قاتتى سوققىدان كوكباۋىرى جىرتىلىپ، ىشىنە قان كەتتى. جەدەل وتا جاساپ، ەكى كۇن بالام جانساقتاۋ بولىمىندە جاتتى. قان مولشەرى تومەندەپ، جاعدايى ناشارلاپ كەتكەن سوڭ دارىگەرلەر قان قۇيىپ، بالامدى امان الىپ قالدى»، - دەيدى نۇرگۇل يگىلىكوۆا.
دارىگەرلەر 12 جاستاعى ايتۋارعا ۇزاق ۋاقىت اۋىر زات، ءتىپتى كىتاپ-داپتەر كوتەرۋگە دە بولمايتىنىن ەسكەرتكەن. ال ساباقتان قالعىسى كەلمەگەن وقۋشى تىعىرىقتان شىعاتىن جولدى ءوزى تاپقان.
«ايتۋار - ۇزدىك وقۋشى. اۋرۋحانادان شىققان سوڭ دەنساۋلىعىڭ تۇزەلگەنشە ۇيدە وقيسىڭ دەگەن ەدىم. كەيىن اسقان ىجداھاتتىلىقپەن ءبىر زاتتى جاساپ وتىرعانىن بايقادىم. سۇراپ ەدىم، بىتكەن سوڭ ءبارىن ءتۇسىندىرىپ، ايتامىن دەپ قىسقا قايىردى»، - دەيدى اناسى.
بىلىمگە قۇشتار بالا ۇيدەگىلەرىنە ساباقتان قالعىسى كەلمەيتىنىن جەتكىزىپ، پۋلتپەن جۇرەتىن سومكە ازىرلەپ جاتقانىن ايتادى. ويى زەرەك، ءوزى العىر ايتۋاردىڭ بۇل ويىن اتا-اناسى دا قۇپتاعان. اسىرەسە، اناسى قولداۋ ءبىلدىرىپ، ول سومكەنىڭ سىرتقى ءپىشىنىن ۇيلەستىرۋگە كومەكتەسكەن.
«يدەياسىن ەستىگەن بويدا قولدادىم. ءوزىم كوركەم ەڭبەك پانىنەن ساباق بەرەمىن. سودان جوبانىڭ كەم-كەتىگىن تولىقتىرۋعا اتسالىستىم. سومكەنى جاساۋ كەزىندە قيىندىقتار بولدى. مىسالى، سومكەنى جۇرگىزۋ مەحانيزمىن ەنگىزۋدە ءبىراز قينالعانىمىز بار. جاساۋعا 4-5 كۇن كەتتى. باستاپقىدا ايتۋار ونى قاعاز، كارتوننان جاساپ كورگەن. پلاستماسسا جاشىگىن، ودان باسقا بىرنەشە ماتەريالدى پايدالانىپ، تيىمدىلىگىن تەكسەردى. ەڭ ءبىرىنشى سومكە پلاستماسسادان جاسالدى»، - دەيدى نۇرگۇل ءابدراش قىزى.
وسىلاي اناسى مەن بالاسى بىرىگىپ، پلاستماسسا ماتەريالىنان جاسالعان سومكە ازىرلەپ شىعاردى. جاس ونەرتاپقىش كىتاپ-داپتەرىن سالىپ الىپ، سومكەمەن مەكتەپكە دەيىن بارعان. «اقىلدى سومكەنى» كورگەن قاتارلاستارى تاڭدانىسىن جاسىرماي، وعان باسپالداقپەن كوتەرىلىپ-تۇسۋگە كومەكتەسكەن.
اناسىنىڭ ايتۋىنشا، تالعامى بيىك، ماقساتى ايقىن ايتۋار ساباقتان قولى قالت ەتسە، سپورت سەكسيالارىنا قاتىسىپ، ۆوكالمەن اينالىسادى. سونىمەن قاتار ول جىلقىعا ءمىنىپ سەرۋەندەگەندى جانى سۇيەدى ەكەن. ءارى ول اكەسىنە 5 گەكتار القاپتى الىپ جاتقان الما باعىن كۇتىپ-باپتاۋدا قولعابىس ەتەدى دە. ءارى جازعى كانيكۋلدا مەدرەسەدە ءدارىس الادى.
دەرەككوز