جول اپاتىنا كىنالى ادام وقيعا ورنىنان قاشىپ كەتسە نە ىستەۋ كەرەك

وسكەمەن. KAZINFORM - كەي جاعدايدا جول اپاتىنا كىنالى ادام وقيعا ورنىنان ءىز سۋىتىپ كەتەدى. وسىنداي جاعدايدا نە ىستەۋ كەرەكتىگىن جانە قاشىپ كەتكەن ادامنىڭ قانداي جازاعا تارتىلاتىنىن انىقتاپ كوردىك.

زاڭ بويىنشا جول اپاتىنا تۇسكەن ادامنىڭ نە ىستەۋ كەرەكتىگىن ءبىلۋ ءۇشىن ش ق و پوليتسيا دەپارتامەنتىنە رەسمي ساۋالحات جولدادىق

- ەڭ الدىمەن جۇرگىزۋشى كولىگىن دەرەۋ توقتاتىپ، ونى ورنىنان قوزعاماۋى قاجەت. اپاتتىق جارىق سيگنالىن قوسىپ، اپاتتى توقتاۋ بەلگىسىن جول قوزعالىسى ەرەجەلەرىنىڭ تالاپتارىنا سايكەس قويۋى كەرەك. سونداي-اق وقيعاعا قاتىستى زاتتار بولسا ونى دا ورنىنان قوزعاماۋى ءتيىس. جاراقات العاندار بولسا دارىگەر كەلىپ جەتكەنگە دەيىنگى العاشقى مەديتسينالىق كومەك كورسەتىپ، جەدەل جاردەم شاقىرۋى قاجەت. ەگەر جاعداي شۇعىل بولىپ، جەدەل جاردەمدى كۇتۋ مۇمكىن بولماسا، زارداپ شەككەندەردى ءوتىپ بارا جاتقان كولىكپەن نەمەسە ءوز كولىگىمەن جاقىن ماڭداعى مەديتسينالىق مەكەمەگە جەتكىزۋى كەرەك. بۇل كەزدە جۇرگىزۋشى ءوزىنىڭ اتى-ءجونىن، كولىكتىڭ مەملەكەتتىك تىركەۋ ءنومىرىن ايتىپ، جەكە باسىن كۋالاندىراتىن قۇجاتتى نەمەسە جۇرگىزۋشى كۋالىگىن جانە كولىكتىڭ تىركەۋ قۇجاتىن كورسەتۋگە مىندەتتى. مەديتسينالىق مەكەمەگە جەتكىزگەننەن كەيىن جۇرگىزۋشى وقيعا ورنىنا قايتا ورالۋى ءتيىس، - دەپ جاۋاپ بەردى دەپارتامەنتتىڭ باسپا ءسوز قىزمەتىنەن.

جول اپاتى تۋرالى پوليتسياعا دەرەۋ حابارلاپ، وقيعانىڭ كۋاگەرلەرى بولسا، ولاردىڭ اتى-ءجونى مەن مەكەنجايىن جازىپ الۋى كەرەك.

سودان كەيىن جول ساقشىلارى كەلگەنشە اپات ورنىندا كۇتۋگە مىندەتتى (ەگەر بۇل جاعداي جول قوزعالىسى ەرەجەلەرىنىڭ 1-بولىمىندەگى 8-تارماقتا كورسەتىلگەن ەرەكشەلىكتەرگە جاتپاسا).

- ال ەگەر جول-كولىك وقيعاسى سالدارىنان باسقا كولىكتەردىڭ قوزعالىسى مۇمكىن بولماسا، جۇرگىزۋشى جولدى اشۋى ءتيىس. جولدى اشار الدىندا كولىك پەن اپاتقا قاتىستى ىزدەر مەن زاتتاردىڭ ورنالاسۋىن كۋالاردىڭ قاتىسۋىمەن تىركەپ، ولاردى مۇمكىندىگىنشە سول قالپىندا ساقتاۋ قاجەت. سونىمەن قاتار اپات ورنىن اينالىپ ءوتۋ ءۇشىن قاۋىپسىز جاعداي جاساۋعا مىندەتتى، - دەلىنگەن اقپاراتتا.

جول اپاتىنا كىنالى ادام وقيعا ورنىنان قاشىپ كەتسە وندا ونىڭ كولىگىن، مەملەكەتتىك تىركەۋ ءنومىرىن جاتتاپ الىپ، پوليتسياعا حابارلاۋ قاجەت.

ەگەر جۇرگىزۋشى جول-كولىك وقيعاسىنا بايلانىستى زاڭمەن بەكىتىلگەن مىندەتتەردى ورىنداماسا، ول اكىمشىلىك قۇقىق بۇزۋ كودەكسىنىڭ 611-بابى بويىنشا جاۋاپكەرشىلىككە تارتىلادى.

ناقتى ايتقاندا:

جول-كولىك وقيعاسىنا قاتىسقان جۇرگىزۋشىنىڭ زاڭدا كوزدەلگەن مىندەتتەرىن ورىنداماۋى - 5 ا ە ك (19660 تەڭگە) مولشەرىندە ايىپپۇل سالۋعا اكەلەدى.

جول اپاتى بولعان جەردەن كەتىپ قالۋ - 50 (196600 تەڭگە) ا ە ك كولەمىندە ايىپپۇل نەمەسە ءبىر جىلعا كولىك قۇرالىن باسقارۋ قۇقىعىنان ايىرۋ جازاسىنا اكەلىپ سوعادى.

جۇرگىزۋشى كۋالىگى جوق نەمەسە كولىك ايداۋ قۇقىعىنان ايىرىلعان ادام بولسا - 100 ا ە ك (393200 تەڭگە) مولشەرىندە ايىپپۇل تولەۋگە مىندەتتەلەدى نەمەسە 30 تاۋلىككە اكىمشىلىك قاماۋعا الىنادى.

جول-كولىك وقيعاسى - تەك ساتسىزدىك ەمەس، ۇلكەن جاۋاپكەرشىلىك. زاڭ تالاپتارىن ورىنداۋ - ءوزىڭىزدىڭ عانا ەمەس، وزگەلەردىڭ دە ومىرى مەن قاۋىپسىزدىگىن قورعاۋ ەكەنىن قاپەردە ۇستاڭىز!

ەسكە سالساق، وسىعان دەيىن شىمكەنتتە جۇرگىزۋشى كۋالىگىن زاڭسىز بەرۋمەن اينالىسقان توپ ۇستالعانى حابارلانعان.