جوشى حان تۋرالى حالىقارالىق تاريحي سەريالدىڭ ءتۇسىرىلىمى باستالدى
استانا. KAZINFORM - شاكەن ايمانوۆ اتىنداعى «قازاق فيلم» ستۋدياسىنىڭ پاۆيلوندارىندا «The Golden Empire» جۇمىس اتاۋىمەن بەلگىلى حالىقارالىق تاريحي سەريالدىڭ ءتۇسىرىلىمى باستالدى.
«دارا» پرەزيدەنتتىك باستامالار قورىنىڭ قولداۋىمەن جۇزەگە اسىرىلىپ جاتقان بۇل جوبا تاريحي ناقتىلىق پەن درامالىق بايانداۋ ۇيلەسىم تاپقان اۋقىمدى مادەني وقيعا بولماق.
اعىلشىن تىلىندەگى دەرەكتى-كوركەم تەلەحيكايانىڭ ءوندىرىسىن Karga Seven Pictures جۇزەگە اسىرۋدا. بۇل كومپانيا 90-نان استام ەلدە Netflix- ءتىڭ توپ-10 تىزىمىنە ەنگەن «وسمان يمپەرياسىنىڭ ورلەۋى» جانە «وسيەت: مۇسانىڭ تاريحى» سياقتى جوبالارىمەن تانىمال. TAURUS Asia Production - جوبانىڭ جەرگىلىكتى سەرىكتەسى.
تاڭعى 6:00-دە ءتۇسىرىلىم الاڭى جاندانا باستادى. العاشقى كادردى تۇسىرمەس بۇرىن، رەجيسسەر ەمرە ساحين، تۇرىك پروديۋسەرى فيكرەت مانوعلۋ جانە TAURUS Asia Production پروديۋسەرى اننا چاكيرتوۆا ءتۇسىرىلىم توبىنا موتيۆاتسيالىق جانە قۇتتىقتاۋ سوزدەرىن جولدادى.
«بۇل - جاي عانا سەريال ەمەس، بۇل وتكەنمەن قۇرىلعان ديالوگ. ءارقايسىڭىز وسى تاريحتى بۇگىنگە جەتكىزۋشىسىز. ءار قادام - ۇجىمدىق ەڭبەكتىڭ ناتيجەسى. سسەناريدەن باستاپ كوستيۋمدەر مەن دەكوراتسياعا، جارىق قويۋدان وپەراتورلىق جۇمىسقا دەيىنگى ءاربىر كەزەڭ - العا جىلجۋدىڭ ماڭىزدى بولىگى. ءبىز بىرگە جۇمىس ىستەيمىز، ءبىر-بىرىمىزگە قولداۋ كورسەتەمىز جانە بۇل جوبانىڭ ەرەكشە بولاتىنىنا سەنەمىز»، - دەدى ەمرە ساحين.
9:10-دا جوباعا ارنايى جاسالعان 12 مەترلىك كيىز ۇيدە العاشقى كادر تاسپاعا ءتۇسىرىلدى. ال تۇسكە دەيىن العاشقى دۋبل ءساتتى شىعىپ بەكىتىلگەن سوڭ، ءتۇسىرىلىم توبى داستۇرگە سايكەس قولتاڭبالار قويىلعان تاباقتى سىندىرىپ، قاتىسۋشىلار ەستەلىككە سىنىقتان الا كەتتى.
- قازىرگى تاڭدا ءتۇسىرىلىم توبى جوعارى دايىندىق دەڭگەيىن جانە ىنتاسىن كورسەتىپ، بەلگىلەنگەن كەستەگە ساي قارقىندى جۇمىس ىستەۋدە. «The Golden Empire» سەريالى قازاقستان كينويندۋسترياسىنىڭ دامۋىنا ەلەۋلى ۇلەس قوسىپ، حالىقارالىق كينەماتوگرافيالىق ىنتىماقتاستىقتى نىعايتۋعا ىقپال ەتەدى، - دەلىنگەن «دارا» پرەزيدەنتتىك باستامالار قورىنىڭ باسپا ءسوز قىزمەتى تاراتقان اقپاراتتا.
وسىعان دەيىن ۇلتتىق كينو ورتالىعى بيىل 10 جاڭا فيلمنىڭ پروكاتقا شىعاتىنى تۋرالى حابارلاعانىن جازعان ەدىك.