جوعارى وقۋ ورىندارىنا قۇجات تاپسىرۋ: ناركوديسپانسەردىڭ قاعازى كەرەك پە

استانا. KAZINFORM - ەرتەڭنەن باستاپ ج و و عيماراتتارىندا ۇزىن-سونار كەزەك پايدا بولماق. مەكتەپ تۇلەكتەرى ءبىلىم گرانتىن يەلەنۋ ءۇشىن جاپپاي قۇجاتتارىن وتكىزە باستايدى.

مۇنداي كەزدە كەيبىر تۇلەكتەر، ءتىپتى، اتا-انالار دا كۇيزەلىسكە ءتۇسىپ، بولاشاققا الاڭدايتىنى بەلگىلى. كەيبىرەۋى جالعان اقپاراتتىڭ جەتەگىندە كەتىپ، قۇجات جيناۋعا باس قاتىرادى. ولاي دەيتىنىمىز، كەيبىر تۇلەكتەر ناركوديسپانسەردىڭ قاعازى كەرەك دەپ زىر جۇگىرىپ ءجۇر. وسى رەتتە، ۇلتتىق تەستىلەۋ ورتالىعىنىڭ باسپا ءسوز قىزمەتىنە حابارلاسىپ، قانداي قۇجاتتار قاجەت ەكەنىن سۇراپ بىلدىك.

«گرانت كونكۋرسىنا قۇجاتتار قابىلداۋ 13-20-شىلدە ارالىعىندا، اقمولا، اقتوبە، اتىراۋ، باتىس قازاقستان، قوستاناي، سولتۇستىك قازاقستان وبلىستارىنىڭ تالاپكەرلەرى ءۇشىن 13-24-شىلدە ارالىعىندا جۇزەگە اسىرىلادى. قۇجاتتاردى جوعارى وقۋ ورىندارىنىڭ قابىلداۋ كوميسسيالارى ارقىلى وفلاين جانە eGov ارقىلى ونلاين تاپسىرۋعا بولادى»، - دەيدى ۇلتتىق تەستىلەۋ ورتالىعىنىڭ باسپا ءسوز قىزمەتى.

سونىمەن، قانداي قۇجاتتار قاجەت؟

- جەكە كۋالىك؛

- ۇ ب ت سەرتيفيكاتى؛

- 3x4 كولەمىندەگى فوتو؛

- ورتا ءبىلىم تۋرالى اتتەستات (كوللەدج تۇلەكتەرى ءۇشىن ديپلوم)؛

- جەڭىلدەتىلگەن سانات بويىنشا كونكۋرسقا قاتىسۋ ءۇشىن راستايتىن قۇجاتتار؛

- B167 ۇشۋ اپپاراتتارىن جانە قوزعالتقىشتاردى ۇشىرىپ پايدالانۋ ماماندىعى ءۇشىن دارىگەرلىك ۇشۋ-ساراپتامالىق كوميسسياسىنىڭ مەديتسينالىق كۋالاندىرۋى؛

- پەداگوگيكالىق جانە مەديتسينالىق ماماندىقتار ءۇشىن ارناۋلى ەمتيحان ناتيجەسى كەرەك.

قوسىمشا اقپارات بويىنشا ج و و- لاردىڭ قابىلداۋ كوميسسيالارىنا جۇگىنۋگە بولادى.

ايتا كەتەيىك، بۇگىن ۇ ب ت قورىتىندىسى شىعىپ، ءبىلىم گرانتتارىنىڭ سانى بەلگىلى بولدى.