جوعارعى سوت: ترامپتىڭ اق ۇيدەگى ارەكەتتەرى ءۇشىن جارتىلاي يممۋنيتەتى بار

استانا. KAZINFORM - ا ق ش جوعارعى سوتى بۇرىنعى پرەزيدەنت دونالد ترامپتىڭ اق ۇيدە بولعان كەزدە جاساعان ارەكەتتەرى ءۇشىن قۋدالاۋدان جارتىلاي يممۋنيتەتكە يە بولدى دەپ شەشتى. شەشىم ترامپتىڭ 2020-جىلعى سايلاۋ قورىتىندىلارىن بۇزۋعا قاتىستى ءسوز بايلاسۋ بويىنشا سوت ءىسىن كەيىنگە قالدىرۋ جانە وعان قارسى باسقا دا ىستەرگە اسەر ەتۋى مۇمكىن، دەپ حابارلايدى BBC.

سوت ءتوراعاسى دجون روبەرتس پرەزيدەنتتىڭ قىزمەت كەزىندە جاساعان رەسمي ارەكەتتەرى ءۇشىن قۋدالاۋدان «ابسوليۋتتى يممۋنيتەتى» بار ەكەنىن ايتتى. يممۋنيتەت بەيرەسمي ارەكەتتەرگە قولدانىلمايدى جانە ايىپتىڭ قىزمەتتىك نەمەسە بەيرەسمي ارەكەتتەرگە قاتىستىلىعىن انىقتاۋ ءۇشىن ءىس تومەنگى ساتىداعى سوتقا جىبەرىلەدى.

ترامپ بۇل شەشىمدى دەموكراتيانىڭ جەڭىسى دەپ اتاپ، الەۋمەتتىك جەلىدەگى پاراقشاسىندا امەريكالىق ەكەنىن ماقتان تۇتاتىنىن جازدى. ءۇش ليبەرالدى سۋديا بۇل شەشىمگە قارسى شىعىپ، ونى پرەزيدەنتتىك ينستيتۋتتى وزگەرتەتىنىن جانە دەموكراتياعا قاۋىپ توندىرەتىنىن مالىمدەدى.

پرەزيدەنت دجو بايدەن مۇنى قاۋىپتى پرەتسەدەنت جانە زاڭ ۇستەمدىگىن بۇزۋ دەپ اتاپ، ەشكىم، ءتىپتى پرەزيدەنت تە زاڭنان جوعارى ەمەس ەكەنىن ايتتى.

«بۇل ەل امەريكادا پاتشالار جوق دەگەن قاعيدا بويىنشا قۇرىلعان. زاڭ الدىندا ءبارىمىز بىردەيمىز. ەشكىم، ءتىپتى ا ق ش پرەزيدەنتى دە زاڭنان جوعارى ەمەس. بۇگىنگى شەشىم ارينە، پرەزيدەنت جاساي الاتىن ءىس جۇزىندە ەشقانداي شەكتەۋلەر جوق دەگەندى بىلدىرەدى. بۇل توپتى كاپيتوليگە جىبەرگەن ادام سول كۇنى بولعان وقيعا ءۇشىن قىلمىستىق جاۋاپكەرشىلىككە تارتىلدى. امەريكا حالقى ءوز جاۋابىن الداعى سايلاۋعا دەيىن سوتتان الۋعا قۇقىلى. ەندى بۇگىنگى شەشىمگە بايلانىستى بۇل ەكىتالاي بولادى»، - دەدى بايدەن دۇيسەنبىگە قاراعان ءتۇنى تەلەديداردا سويلەگەن سوزىندە.

اقپان ايىندا جوعارعى سوت ترامپتىڭ سايلاۋ قورىتىندىلارىن جوققا شىعارعىسى كەلەتىن ءىس بويىنشا يممۋنيتەتى جوق دەگەن شەشىمگە شاعىمىن قاراۋعا كەلىستى. ارنايى پروكۋرور دجەك سميت اپەللياتسيالىق پروتسەسس كەيىنگە قالدىرىلادى دەپ قورقىپ، سوتتان ارالاسۋدى سۇرادى. يممۋنيتەت تۋرالى شەشىم شىققانشا سوت وتىرىسى كەيىنگە قالدىرىلدى.