جوعارعى سوت پەن پارلامەنت اراسىندا تۇراقتى ديالوگ قاجەت

استانا. KAZINFORM - استانا قالاسىنىڭ مامانداندىرىلعان اۋداندارالىق اكىمشىلىك سوتىنىڭ عيماراتىندا پارلامەنت ءماجىلىسىنىڭ دەپۋتاتتارى مەن اكىمشىلىك سوتتار سۋديالارىنىڭ اكىمشىلىك ءىس جۇرگىزۋدى ودان ءارى دامىتۋ ماسەلەلەرى اياسىندا جۇمىس كەزدەسۋى ءوتتى. بۇل تۋرالى جوعارعى سوتتىڭ باسپا ءسوز قىزمەتى ءمالىم ەتتى.

استانا قالاسىنىڭ مامانداندىرىلعان اۋداندارالىق اكىمشىلىك سوتىنىڭ عيماراتىندا پارلامەنت ءماجىلىسىنىڭ دەپۋتاتتارى (زاڭناما جانە سوت-قۇقىقتىق رەفورما، الەۋمەتتىك- مادەني دامۋ، ەكونوميكالىق رەفورما جانە وڭىرلىك دامۋ، حالىقارالىق قاتىناستار، قورعانىس جانە قاۋىپسىزدىك، ەكولوگيا جانە تابيعاتتى پايدالانۋ، قارجى جانە بيۋجەت، اگرارلىق ماسەلەلەر جونىندەگى كوميتەتتەرى) مەن اكىمشىلىك سوتتار سۋديالارىنىڭ اكىمشىلىك ءىس جۇرگىزۋدى ودان ءارى دامىتۋ ماسەلەلەرى اياسىندا جۇمىس كەزدەسۋى ءوتتى.

- كەزدەسۋ قولدانىستاعى اكىمشىلىك راسىمدىك-پروتسەستىك كودەكسىنىڭ (ا ر پ ك) تيىمدىلىگىن، قولدانىستاعى سوت جانە اكىمشىلىك پراكتيكانى جان-جاقتى تالداۋعا ءارى اكىمشىلىك ادىلەت ينستيتۋتىن ودان ءارى جەتىلدىرۋ جونىندە ۇسىنىستار ازىرلەۋگە ارنالدى، - دەلىنگەن حابارلامادا.

قازاقستان رەسپۋبليكاسى جوعارعى سوتىنىڭ اكىمشىلىك ىستەر جونىندەگى سوت القاسىنىڭ ءتوراعاسى اسلان تۇكيەۆ ازاماتتاردىڭ قۇقىقتارى مەن بيزنەستىڭ زاڭدى مۇددەلەرىن اكىمشىلىك ورگانداردىڭ زاڭسىز ارەكەتتەرىنەن قورعاۋ قۇرالى رەتىندە اكىمشىلىك ادىلەتتىڭ ماڭىزدىلىعىن اتاپ ءوتتى.

ءوز كەزەگىندە، دەپۋتات ماگەررام ماگەرراموۆ جوعارعى سوتپەن اكىمشىلىك ادىلەتتى زاڭنامالىق قامتاماسىز ەتۋ ماسەلەلەرى بويىنشا ىنتىماقتاستىقتى تەرەڭدەتۋگە مۇددەلىلىك تانىتتى.

كەزدەسۋگە قاتىسۋشىلار سىن-قاتەرلەرگە جەدەل دەن قويۋ جانە زاڭنامالىق نەگىزدى جەتىلدىرۋ ءۇشىن جوعارعى سوت پەن پارلامەنت اراسىندا تۇراقتى ديالوگ قاجەتتىلىگى تۋرالى ورتاق پىكىرگە كەلدى.

بۇعان دەيىن حابارلانعانداي، قازاقستان تۇركى مەملەكەتتەرى ۇيىمى جوعارعى سوتتارىنىڭ كونفەرەنسياسىنا قاتىستى.