جوعارعى سوت: مەكتەپتەردە ورامال تاعۋعا سالىنعان تىيىم جويىلعان جوق
استانا. KAZINFORM – ق ر جوعارعى سوتى مەكتەپتە قىز بالالارعا ورامال تاعۋعا سالىنعان تىيىم الىنباعانىن مالىمدەدى.
"بۇقارالىق اقپارات قۇرالدارىندا جانە الەۋمەتتىك جەلىلەردە جوعارعى سوت مەكتەپتەردە ورامال تاعۋدى زاڭدى دەپ تاپتى دەگەن جالعان اقپارات تارالۋدا.
ءىستى قاراۋ اياسىندا جوعارعى سوتتىڭ اكىمشىلىك ىستەر جونىندەگى سوت القاسى ءبىلىم بەرۋ مەكەمەسىندە ورامال تاعۋدىڭ زاڭدىلىعى جونىندەگى ماسەلەنى تالقىلاۋعا ارالاسپاعان.
كاسساتسيالىق ساتى مەكتەپتىڭ وقۋشىنى ساباققا جىبەرمەۋىن زاڭسىز دەپ تانىدى، ويتكەنى ءبىلىم الۋ قۇقىعى قازاقستان رەسپۋبليكاسى ازاماتتارىنىڭ نەگىزگى كونستيتۋتسيالىق قۇقىقتارىنىڭ ءبىرى بولىپ تابىلادى.
سونىمەن قاتار، بەيىندى مينيسترلىكتە ورتا ءبىلىم بەرۋ ۇيىمدارى ءۇشىن مىندەتتى مەكتەپ فورماسىنا قويىلاتىن تالاپتاردى بەكىتۋ جونىندەگى وكىلەتتىكتەر بار. ءمينيستردىڭ ءتيىستى بۇيرىعى زاڭسىز دەپ تانىلماعان جانە كۇشى جويىلماعان" دەلىنگەن حابارلامادا.
سونداي-اق، جوعارعى سوت باسپا ءسوز قىزمەتى اتا-انالار مەكتەپ جارعىسى مەن مەكتەپ فورماسىنا قويىلاتىن تالاپتاردى ساقتاۋعا مىندەتتى ەكەنىن اتاپ وتكەن.
بۇل رەتتە ەلىمىزدەگى ەڭ جوعارعى سوت ورگانى اتا- انالاردىڭ بالالاردى تاربيەلەۋ مەن ءبىلىم بەرۋ، ولاردىڭ قۇقىقتارى مەن مۇددەلەرىن قورعاۋ جونىندەگى وزدەرىنە العان جانە زاڭدا بەلگىلەنگەن، ونىڭ ىشىندە اكىمشىلىك قۇقىق بۇزۋشىلىق تۋرالى كودەكستە كوزدەلگەن مىندەتتەردى ورىنداماۋى جاۋاپتىلىققا اكەپ سوعاتىنىن ەسكە سالادى.
ايتا كەتسەك، قازاقستاندىق زاڭگەر جاسلان ايتماعانبەتوۆ وقۋشى قىزدىڭ ورامال تاققانى ءۇشىن مەكتەپ قابىرعاسىندا ءبىلىم الۋىنا شەكتەۋ قويۋ ماسەلەسىن كوتەرىپ، جوعارعى سوتقا جۇگىنگەن. كەشە ول وسى ءىس بويىنشا شەشىم قابىلدانعانىن مالىمدەگەن ەدى.
مەكتەپتەردە حيدجاب كيۋگە رۇقسات بەرۋ ماسەلەسى ەلىمىزدە بىرنەشە جىلدان بەرى تالقىلانىپ كەلەدى.
بۇعان دەيىن وقۋ-اعارتۋ ءمينيسترى عاني بەيسەمبايەۆ وقۋشىلاردىڭ مەكتەپكە حيدجابپەن كەلۋىنە قاتىستى بىلاي دەگەن ەدى:
«كونستيتۋتسيا بويىنشا قازاقستان - زايىرلى مەملەكەت. مەكتەپ تە زايىرلى بولىپ سانالادى. 2016 -جىلى بەكىتىلگەن وقۋشىلاردىڭ مەكتەپ فورماسى مەن كيىمىنە قاتىستى بۇيرىق بار. ول وزگەرگەن جوق. سوندىقتان بالالار ءبىلىم ورداسىنا مەكتەپ فورماسىمەن كەلۋى كەرەك».
سونداي- اق، پرەمەر-ءمينيستردىڭ ورىنباسارى تامارا دۇيسەنوۆا جۇمىستا حيدجاب كيۋ ماسەلەسىنە پىكىر ءبىلدىردى.