جوعارعى سوت شەرزات ءىسى تۋرالى: الماتى وبلىسىندا وتىرىستى ب ا ق وكىلدەرىن قاتىستىرىپ وتكىزۋ مۇمكىندىگى بار

استانا. KAZINFORM - جوعارعى سوت Kazinform ساۋالىنا جولداعان جاۋابىندا شەرزات پولاتتىڭ ولىمىنە قاتىستى سوت وتىرىسىن اشىق وتكىزۋدىڭ مۇمكىندىكتەرى تۋرالى ۇستانىمىن ءبىلدىردى.

«قىلمىستىق ءىس قىلمىستىق قۇقىق بۇزۋشىلىق جاسالعان جەردەگى سوتتا قارالۋعا جاتادى (ق ر ق پ ك 314-بابىنىڭ 1-بولىگى). الماتى وبلىسىندا سوت وتىرىستارى اشىق وتكىزىلۋى جونىندە شەشىم قابىلدانعان جاعدايدا، ب ا ق وكىلدەرىنىڭ قاتىسۋىمەن ءتيىستى دەڭگەيدە وتكىزۋ مۇمكىنشىلىگى بار. جۋرناليستەر اشىق سوت پروتسەسىنە قاتىسا وتىرىپ، پروتسەسكە قاتىسۋشىلاردىڭ دەربەس دەرەكتەرگە قۇقىقتارىن قورعاۋدى ەسكەرە وتىرىپ، ءتوراعالىق ەتۋشى سۋديانىڭ رۇقساتىمەن سوت زالىنان اقپاراتتى ب ا ق-قا تاراتۋعا قۇقىلى»، - دەپ جازىلعان جاۋاپتا.

سوت ورگانىنداعىلار ازىرگە شەرزات پولاتتىڭ ولىمىنە قاتىستى ءىس-ماتەريالدارى سوتقا تۇسپەگەنىن ەسكە سالعان.

«وسىعان وراي سوتتىڭ اشىق ءوتۋى تۋرالى ۇسىنىستار تۇسكەن جوق. پروتسەسسۋالدىق زاڭناماعا سايكەس ونلاين-ترانسلياتسيا تۋرالى شەشىمدى ءىس بويىنشا ءتوراعالىق ەتۋشى سۋديا پروتسەسكە قاتىسۋشىلاردىڭ پىكىرلەرىن ەسكەرە وتىرىپ، قابىلدايدى (ق ر ق پ ك 345-بابىنىڭ 6-بولىگى، ق ر ا پ ك 19-بابىنىڭ 7-بولىگى)»، - دەپ جازدى جوعارعى سوت وكىلدەرى.

بۇعان دەيىن الماتى وبلىسىنىڭ پروكۋرورى بەرىك اداموۆ شەرزات پولاتقا قاتىستى سوت پروتسەسىن ونلاين وتكىزۋ تۋرالى ءوتىنىش بەرەتىنىن ايتقان ەدى.

اۆتور
ەسىمجان ناقتىباي