جەتىسۋلىق جۇگەرى وسىرۋشىلەر بيىل دا شىعىنعا ۇشىراي ما - شارۋالار دابىل قاقتى

تالدىقورعان. KAZINFORM - جەتىسۋلىق شارۋالار بيىل 41 مىڭ گەكتارعا جۇگەرى سەپكەن. 2-قىركۇيەكتەگى مالىمەت بويىنشا، سونىڭ 4,7 مىڭ گەكتارى ورىلعان. ساتىپ الۋشىلار ەڭ جوعارعى ساپاداعى داقىلدىڭ كەلىسىن 60 تەڭگەدەن باعالاپ وتىر.

بىلتىر ءونىمدى وتكىزە الماي شىعىنعا ۇشىراعان جۇگەرى وسىرۋشىلەر بيىل دا ەڭبەك اقتالماي قالا ما دەپ الاڭداپ وتىر. ويتكەنى، جۇگەرىنىڭ تونناسىن 60 مىڭ تەڭگەدەن قابىلداپ جاتىر. ونىڭ وزىندە بۇل ىلعالدىلىعى 14 پايىز داقىلدىڭ باعاسى.

«جۇگەرىنى ءالى جيناعان جوقپىن. ويتكەنى، ىلعالدىلىعىن ولشەسەم 18 پايىز بولىپ تۇر. الداعى كۇندەرى جاۋىن- شاشىن بولماسا 10-12 كۇندە كەۋىپ قالار. ەگەر جاڭبىر بولسا قازىرگى ساپاعا دا جەتە الماي قالۋىمىز مۇمكىن. تاۋەكەلگە بارىپ وتىرمىز، ويتكەنى وسى كۇيىندە ساتساڭ كەلىسى 43 تەڭگەگە وتەدى. ودان پايدا جوق. ساتىپ الۋشىلاردىڭ قويىپ وتىرعان باعاسى وتە تومەن، بۇل ءبىزدىڭ شىعىندى تولىق وتەمەيدى»، - دەيدى «كۆيتكو» شارۋا قوجالىعىنىڭ جەتەكشىسى.

سالاعا جاۋاپتىلار بيىل جۇگەرىنىڭ ءار كەلىسىنە 10 تەڭگەدەن قارجىلاي قولداۋ بەرىلەتىنىن ايتادى. ءبىراق بۇل قايتا وڭدەۋدەن وتكەن ونىمگە عانا تولەنەدى. ياعني، زاۋىتقا وتكىزگەندەرگە. ال پانفيلوۆ اۋدانداعى كاسىپورىنعا جۇگەرىنى جەتكىزۋ شارۋالار ءۇشىن قوسىمشا شىعىن. سوندىقتان ولار ترەيدەرلىك كومپانياعا ساتۋعا ءماجبۇر.

«وتكىزۋ ماسەلەسىمەن نەگىزىنەن ترەيدەرلەر شۇعىلدانادى. بۇل شارۋالارعا اسا ءتيىمدى ەمەس. بىزدە ازىق- تۇلىك كورپوراتسياسىنىڭ فيليالى اشىلسا، ماسەلە رەتتەلەر ەدى. ءمينيستردىڭ تاپسىرماسىمەن بيىل اشۋ كەرەك بولعان، ءبىراق ليتسەنزيالىق ەليەۆاتور جوق دەگەن سىلتاۋمەن اشىلمادى. وسى ماسەلەنىڭ قولعا الىنۋىن بارلىق شارۋالار تىلەپ وتىر. بيىل دا جۇگەرى وسىرۋشىلەردىڭ جاعدايى قيىن. ولارعا مينيسترلىكتەن كومەك كەرەك»، - دەيدى وبلىستىق فەرمەرلەر وداعىنىڭ ءتوراعاسى اسقار ءشارىپوۆ.

ال وبلىستىق اۋىل شارۋاشىلىعى باسقارماسىنىڭ باسشىسى نۇرداۋلەت كەنەنبايەۆ: «وسى باعىتتا ءبىز ەكى كاسىپكەرمەن جۇمىس ىستەپ وتىرمىز. بارلىق تالاپتارىنا ساي كەلىپ تۇر. زەرتحانالىق سەرتيفيكاتقا قۇجاتتارىن وتكىزدى. سەرتيفيكاتتى العاننان كەيىن بىزگە ءوتىنىم بەرەدى. سودان كەيىن ءبىز زاڭ تالابىنا ساي بولسا ليتسەنزياسىن قولىنا بەرەمىز»، - دەيدى.

جالپى، بيىل جەتىسۋدا جۇگەرى القابى 16 مىڭ گەكتارعا ازايعان. 41 مىڭ گەكتار القاپتان 282 مىڭ توننا جۇگەرى جينالادى دەپ جوسپارلانۋدا.

ەسكە سالا كەتەيىك، بۇعان دەيىن جەتىسۋ وبلىسىندا اۋىل تۇرعىندارى ەگىستىك جەر الا الماي وتىرعانىن جازعانبىز.

اۆتور

ايبەك قۇتتىبەك