جەتىسۋدا مەدبيكە ناۋقاستاردىڭ اتىنان 6 ميلليون تەڭگەگە جۋىق نەسيە راسىمدەگەن
تالدىقورعان. KAZINFORM - كوكسۋ اۋداندىق ورتالىق اۋرۋحاناسىنىڭ مەدبيكەسى وزىنە قاراستى ۋچاسكەدە ەسەپتە تۇرعان بالپىق بي اۋىلى شادرين ىقشاماۋدانى تۇرعىندارىنىڭ اتىنان تاۋارلىق نەسيە راسىمدەگەن. مەديتسينا مامانىنىڭ ونشاقتى ادامنىڭ اتىنان 6 ميلليون تەڭگەگە جۋىق كرەديت العانى دالەلدەندى.
مەدبيكە 67 جاستاعى ءمۇنيرا قاتاشتىڭ ۇيىنە بارىپ، قان قىسىمىن، قانت ديابەتىن تەكسەرىپ جۇرگەن. زەينەتكەردىڭ ايتۋىنشا، «جۇمىسقا ەسەپ بەرەمىن» دەپ ۇيالى تەلەفونىنا سۋرەتكە تۇسىرۋگە رۇقسات سۇراعان.
ەش ويلانباستان كەلىسىمىن بەرگەن زەينەتكەرگە ءبىراز ۋاقىت وتكەن سوڭ بانك قىزمەتكەرلەرى حابارلاسىپ نەسيەسىن تولەۋدى تالاپ ەتكەن.
- بايان دەگەن مەيىربيكەگە قالاي الدانىپ قالعانىمدى بىلمەيمىن. وتادان كەيىن توسەگىمدە جاتقانمىن، مەنى سۋرەتكە ءتۇسىرىپ الىپ كەتىپتى. ءبىر كۇنى كرەديتىڭ بار دەپ بانكتەن حابارلاستى. ءوزىم ونكولوگيامەن اۋىرام. ەكى بالام قايتىس بولعان. وسى ۇيدە جەسىر كەلىنىم بار، جەتىم بالالارىم بار. ەشتەڭەم جوق. جالعىزباستى انامىن. مەنى الداپ 500 مىڭ تەڭگە كرەديت الىپ كەتىپتى. اي سايىن 40 مىڭ تەڭگە تولەۋىم كەرەك. ونى مەن نەمەن تولەيمىن؟ سوت قالاي ۇكىم شىعارىپ وتىر؟، - دەيدى ءمۇنيرا قاتاش.
مەدبيكەگە الدانعاندار - زەينەتكەرلەر مەن مۇگەدەك جاندار. نەسيە ولاردىڭ اتىنا ءساۋىر، مامىر ايلارىندا راسىمدەلگەن. 8 ادامنىڭ ءارقايسىسىنان 500 مىڭنان باستاپ ميلليون تەڭگەگە دەيىن العان.
- ابدەن سەنىمگە كىردى. 28-مامىر كۇنى ۇيىمە كەلىپ، ءسىزدى وسى جەرگە تىركەۋگە قويۋ ءۇشىن سۋرەتكە ءتۇسىرىپ الۋىم كەرەك، قۇجاتىڭىزدى بەرىڭىز دەپ اتى-ءجونىمدى، ءبارىن جازىپ الىپ كەتتى. ويىمدا ەشتەڭە جوق، سودان ەكى ايدان سوڭ «حوۋم كرەديت بانك» حابارلاسىپ، «قارىزىڭىزدى قاشان تولەيسىز» دەپ تۇر. نە كرەديت دەپ بانكتەگى قىزبەن سوزگە كەلىپ قالدىم. كەيىننەن مەنىڭ بانك شوتىمدى بۇعاتتاپ تاستادى. جالاقىمدى الا الماي ءجۇرمىن. مىنە، وسىنداي جاعداي. ءوزىمىز تولەپ وتىرمىز، - دەيدى مۇحامەدجان قوڭقاشەۆ.
الاياققا الدانعاندار جينالىپ قۇزىرلى ورگانعا ارىزدانعان. كوكسۋ اۋداندىق سوتى 1983 -جىلعى ازاماتشانى ق ك 190-بابىنىڭ 1-بولىگىمەن كىنالى دەپ تانىعان. 3 جىل 6 ايعا باس بوستاندىعىن شەكتەۋ جازاسىن تاعايىنداپ، ماتەريالدىق شىعىندى وتەۋ مىندەتتەلگەن.
2024 -جىلعى 11-قىركۇيەكتەگى ۇكىمدە بىلاي دەلىنگەن:
«سوتتالعان س. ب. ج. باس بوستاندىعى شەكتەلگەن بۇكىل مەرزىم ىشىندە پروباتسيالىق باقىلاۋدا بولادى. ول سوتتالعان ادامنىڭ مىنەز-قۇلقىن جۇزەگە اسىراتىن ۋاكىلەتتى مەملەكەتتىك ورگانعا حابارلاماي، تۇرعىلىقتى جەرىن، جۇمىسىن اۋىستىرماۋعا ءتيىس. سونداي-اق تۇرعىلىقتى جەرى بويىنشا اكىمشىلىك- اۋماقتىق بىرلىك شەگىنەن تىس جەرگە كەتپەۋى كەرەك».
جابىرلەنۋشىلەر سوت شەشىمىنىڭ ەشقانداي پايداسى بولمادى دەيدى. سەبەبى، بارلىعى نەسيەسىن وزدەرى تولەپ وتىر. ال زاڭگەرلەر زەينەتكەرلەر بانكپەن نەسيە كەلىسىمشارتىنىڭ كۇشىن جويۋ تۋرالى تالاپ-ارىز بەرمەگەنىن، سوندىقتان ماسەلە شەشىلمەي قالعانىن ايتادى.
- مۇنداي جاعدايدا ازاماتتىق تالاپ بويىنشا مامىلەنى جارامسىز دەپ بەرۋ كەرەك ەدى، سوتتىڭ ۇكىمى وسىعان نەگىز بولاتىن ەدى. سوتتالۋشىدان اقشانى ءوندىرىپ الۋ تۋرالى شەشىم شىققان، ەندى تەك قانا شەشىمنىڭ ورىندالۋى. سوت ورىنداۋشىلارمەن شەشىمنىڭ ورىندالۋىنا جۇمىس جاساۋ كەرەك، - دەيدى جەتىسۋ وبلىستىق ادۆوكاتتار القاسىنىڭ ادۆوكاتى ەركىن وڭعاربايەۆ.
سوتتالۋشى مەدبيكە قازىر جۇمىسسىز. ال شىعىندى ءوندىرىپ الاتىنداي ونىڭ اتىندا ەشقانداي دۇنيە-مۇلكى جوق.
زاڭگەرلەر ەندى الدانعان ازاماتتار سوتقا اپپەلياتسيالىق شاعىمنىڭ مەرزىمىن قالپىنا كەلتىرۋ تۋرالى ارىز جازىپ، ودان ءارى نەسيە كەلىسىمشارتىنىڭ كۇشىن جويۋ تۋرالى تالاپ-ارىز قويۋىنا بولاتىنىن ايتادى.
اۆتور
ايبەك قۇتتىبەك