جەتىسۋدا كورنەكى اقپاراتتىڭ تىلدىك ساپاسىنا قويىلاتىن تالاپ كۇشەيتىلەدى

تالدىقورعان. KAZINFORM - جەتىسۋ وبلىسىندا كاسىپكەرلىك نىساندارداعى كورنەكى اقپارات پەن جارناما ماتىندەرىنىڭ مەملەكەتتىك تىلدە ساۋاتتى جازىلۋىن قامتاماسىز ەتۋ ماقساتىندا مونيتورينگ جۇمىستارى باستالدى. بۇل تۋرالى ب. قۇرانبەك اتىنداعى جۋرناليستەر ۇيىندە وتكەن باسپا ءسوز ءماسليحاتىندا وبلىستىق قوعامدىق دامۋ باسقارماسىنىڭ ءبولىم باسشىسى ەرمەك اقشابايەۆ مالىمدەدى.

- انىقتالعان زاڭبۇزۋشىلىقتار بويىنشا كاسىپ يەلەرىنە ەسكەرتۋلەر بەرىلىپ، ءتۇسىندىرۋ جۇمىستارى جۇرگىزىلدى. كورنەكى اقپاراتتىڭ مازمۇنى مەن ءماتىنى قازاقستان رەسپۋبليكاسىنداعى ءتىل تۋرالى زاڭ تالاپتارىنا ساي بولۋى ءتيىس، - دەدى ەرمەك اقشابايەۆ.

ونىڭ ايتۋىنشا، بۇگىنگە دەيىن تالدىقورعان قالاسى بويىنشا 220-دان استام كاسىپكەرلىك نىسان تەكسەرىلىپ، 113 قۇقىقبۇزۋشىلىق تىركەلگەن. ءجيى كەزدەسەتىن قاتەلىكتەردىڭ قاتارىندا مەملەكەتتىك تىلدەگى اۋدارمالاردىڭ ماعىناسى بۇرمالانۋى، ورفوگرافيالىق جانە گرامماتيكالىق قاتەلەردىڭ بولۋى اتاپ ءوتىلدى.

باسقارما ماماندارىنىڭ حابارلاۋىنشا، مۇنداي تەكسەرىستەر الداعى ۋاقىتتا دا جالعاسىن تابادى. مونيتورينگتىك توپتىڭ قۇرامىندا وبلىستىق قوعامدىق دامۋ باسقارماسىنان بولەك، حالىقارالىق «قازاق ءتىلى» قوعامىنىڭ جەتىسۋ وبلىستىق فيليالىنىڭ وكىلدەرى دە بار.

- قوعامدىق ورىنداردا نەمەسە كاسىپكەرلىك نىساندارداعى كورنەكى اقپاراتتا كەتكەن تىلدىك قاتەلەر تۋرالى كەز كەلگەن ازامات «E-otinish» پلاتفورماسى ارقىلى ءتيىستى ورگاندارعا حابارلاي الادى، - دەپ اتاپ ءوتتى باسقارما وكىلى.

سونداي-اق جارناما اگەنتتىكتەرىمەن بىرلەسكەن جۇمىستار جاندانىپ، ءوزارا ىنتىماقتاستىق تۋرالى مەموراندۋمدارعا قول قويىلۋدا. مەملەكەتتىك تىلدەگى ماتىندەردىڭ ساپاسىن ارتتىرۋ ماقساتىندا ارنايى جادىنامالار دايىندالىپ، باق جانە الەۋمەتتىك جەلىلەر ارقىلى كەڭىنەن تاراتىلادى.

ايتا كەتەيىك، قازاق تىلىندەگى بالالار ادەبيەتى سيفرلىق فورماتقا كوشىرىلەتىنىن جازعانبىز.

اۆتور

تاستان تويانوۆ