جەتىسۋعا بىلتىر 2 ميلليون تۋريست كەلگەن

تالدىقورعان. KAZINFORM - جەتىسۋعا بىلتىر 2 ميلليون تۋريست كەلگەن. سونداي-اق، وبلىستا 3,5 ميلليارد تەڭگە جەكە ينۆەستيتسيا تارتىلىپ، تۋريزم سالاسىندا 17 جاڭا نىسان ىسكە قوسىلعان.

جالپى، وڭىردە تۋريزم سالاسىن دامىتۋ 5 دەستيناتسياعا نەگىزدەلگەن. بۇل - الاكول، بالقاش كولدەرى، «التىنەمەل» جانە «جوڭعار الاتاۋى» ۇلتتىق پاركتەرى، سونداي-اق جوڭعار الاتاۋىنىڭ تاۋ الابى.

«وبلىس تۋريزمىن ىلگەرىلەتۋ ءۇشىن 2023-جىلى «سيۆەرس الما اعاشىنىڭ گۇلدەۋى فەستيۆالى»، «شاعان Fest»، «كوكسۋ Water Fest»، «التىنەمەل - قۇلاندار مەكەنى» سياقتى 30 دان استام ءىس-شارا وتكىزىلدى. اتالعان ءىس-شارالار جىل سايىن تۇراقتى تۇردە ۇيىمداستىرىلادى. سونداي-اق تۋربيزنەس، ماسس-مەديا وكىلدەرى ءۇشىن ءوڭىردىڭ تۋريستىك مۇمكىندىكتەرىن ناسيحاتتاۋ، تانىتۋ جانە تۋريستەردى تارتۋ ءۇشىن 6 اقپاراتتىق تۋر وتكىزىلدى. وسى جىلى دا فەستيۆالدار، روۋد-شوۋلار، ءتۇرلى اقپاراتتىق تۋرلار وتكىزۋ، سونداي-اق تۋريستىك كورمەلەرگە، ونىڭ ىشىندە حالىقارالىق كورمەلەرگە قاتىسۋ جوسپارلانعان»، - دەيدى باسقارما وكىلدەرى.

سونىمەن قاتار، بيىل جەتىسۋ وبلىسىندا ءتۋريزمدى دامىتۋ بويىنشا ماستەر-جوسپار ازىرلەنەدى.

ماستەر-جوسپاردا تۋريستىك الەۋەتتى تالداۋ، ءاربىر پەرسپەكتيۆالى ورىندار مەن وبەكتىلەر بويىنشا ءتۋريزمنىڭ جاڭا ءوسۋ نۇكتەلەرىن اشۋ، ينجەنەرلىك، جول ينفراقۇرىلىمىن كەشەندى دامىتۋ، دامۋدىڭ جاڭا پەرسپەكتيۆالىق نۇكتەلەرىن قالىپتاستىرۋ، دەرەكتەردى سيفرلاندىرۋ، تۋريستىك ناۆيگاتسيانى دامىتۋ جونىندەگى جۇمىستار ەسكەرىلەتىن بولادى.