جەتىسايدا قاۋىن ءپىستى
جەتىساي. KAZINFORM - جەتىسايلىق شارۋالار ەرتە پىسكەن قاۋىندارىن شەتەلگە جونەلتىپ، ەكسپورتتى باستاپ كەتتى.
ءال-فارابي كۇزەنبايەۆ باسقاراتىن «ءال-فارابي» شارۋا قوجالىعى العاشقى 100 توننا ءونىمىن رەسەي فەدەراتسياسىنا ەكسپورتتاپ جاتىر. ديقان 50 گەكتار جەرگە «نۇر- باكينكا» جانە «دامپەرا» سورتتى قاۋىندار ەكسە، قوسىمشا 250 گەكتار القاپقا ماقتا ءشيتىن سەپكەن. قاۋىن كوشەتتەرى اۋا رايىنىڭ ەرەكشەلىكتەرىنە بايلانىستى جوسپارلانعان 65 كۇننەن ءسال ۇزاعىراق - 70 كۇندە ءپىسىپ جەتىلدى.
- بيىل قاۋىنىمىز دا ءپىستى. رەسەي نارىعىنان سۇرانىس جوعارى. قاۋىننىڭ كەلىسىن ەگىستىك باسىنان 400 تەڭگەدەن وتكىزىپ جاتىرمىز. ەشقانداي دەلدالسىز، ءوزىمىز تيەپ جىبەرىپ جاتىرمىز، - دەيدى شارۋا قوجالىعىنىڭ ءتوراعاسى.
شارۋاشىلىق بۇگىندە 30-عا جۋىق جەرگىلىكتى تۇرعىندى ماۋسىمدىق جۇمىسقا تارتقان. ولارعا كۇن سايىن 8-12 مىڭ تەڭگە ارالىعىندا جالاقى تولەنەدى. جالپى ديقان گەكتارىنان 400 سەنتنەر ءونىم الۋدى جوسپارلاپ وتىر.
ايتا كەتەيىك، جەتىساي اۋدانى بويىنشا اۋىل شارۋاشىلىعى جۇمىستارى قارقىندى ءجۇرىپ جاتىر. بيىل 79,3 مىڭ گەكتار سۋارمالى جەردىڭ 43 مىڭ گەكتارىنا ماقتا,16,7 مىڭ گەكتارىنا باقشا، 7,5 مىڭ گەكتارىنا داندىك جۇگەرى، 3,6 مىڭ گەكتارىنا كوكونىس، 6,7 مىڭ گەكتارىنا مال ازىقتىق داقىلدار ەگىلگەن. قازىر اۋدان ديقاندارى 36 مىڭ توننا كوكونىس ءونىمىن جيناپ ۇلگەردى.