جەتىسۋ وبلىسىنىڭ اۋىلدارىندا 5 جاڭا الەۋمەتتىك نىسان ىسكە قوسىلىپ، 70 وتباسى باسپانالى بولدى
تالدىقورعان. KAZINFORM - جەتىسۋ وبلىسىنىڭ اۋىلدارىندا رەسپۋبليكا كۇنى قارساڭىندا 5 جاڭا الەۋمەتتىك نىسان پايدالانۋعا بەرىلدى. ولاردىڭ ىشىندە دارىگەرلىك امبۋلاتوريا، اۋىلدىق كلۋب، اۋىلدىق اكىمدىك، ساياباق جانە باسقا دا وبەكتىلەر بار، دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.
ماسەلەن، مەرەكە قارساڭىندا ەسكەلدى اۋدانىندا 2 بىردەي نىسان پايدانالۋعا بەرىلدى. اتاپ ايتقاندا، جالعىزاعاش اۋىلىندا جاڭا بلوكتى-مودۋلدى اۋىلدىق مادەنيەت كلۋبى اشىلسا، قاراتال اۋىلىندا بلوكتى-مودۋلدى اۋىلدىق اكىمدىك پايدالانۋعا بەرىلدى.
سول سياقتى دارىگەرلىك امبۋلاتوريالار تەكەلى قالاسىندا جانە كۇردەلى جوندەۋدەن كەيىن كوكسۋ اۋدانىنىڭ مۇقىرى اۋىلىندا قولدانىسقا بەرىلدى.
- مۇقىرى اۋىلدان تۋىپ-ءوستىم. اتا-انام دا وسى اۋىلدىڭ تۋماسى. ەرتەرەكتە بۇل اۋىلدا مەدپۋنكت بولعان، سوسىن فەلدشەرلىك-اكۋشەرلىك پۋنكت سالىندى، كەيىن سەكسەنىنشى جىلدارى دارىگەرلىك امبۋلاتوريا تۇرعىزىلدى. سوڭعى جىلداردا عيماراتتىڭ ءىشى سۋىق، جوندەۋدى قاجەت ەتەتىن. مەرەكە قارساڭىندا جاڭارىپ، جاڭعىرتىلعان نىساندى قولدانىسقا بەرىپ وتىر. قان قىسىمى جوعارى بولعاندىقتان امبۋلاتوريادا ەسەپتە تۇرامىن. دارىگەرلەرىمىز بىلىكتى، ەسەپتەگى پاتسيەنت رەتىندە دارىلەرىمىزدى تەگىن، ۋاقىتىلى الىپ تۇرامىز، - دەيدى مۇقىرىلىق تۇرعىن جۇمادىل جولدىبايەۆ.
اتاپ وتسەك، مۇقىرى اۋىلىندا 3,5 مىڭ ادام تۇرادى، سوندىقتان مۇنداعى مەديتسينالىق نىساندى جاڭارتىپ، قىزمەت كورسەتۋ ساپاسىن ارتتىرۋدىڭ ماڭىزى زور. دەنساۋلىق ساقتاۋ ينفراقۇرىلىمىن جاڭعىرتۋمەن قاتار كادرلىق ماسەلەلەر دە شەشىمىن تابۋدا.
- مەديتسينالىق جوعارى وقۋ ورنىن بىتىرگەنىمە ءبىر جول بولدى. اۋىلعا جۇمىس ىستەۋگە كەلدىم، وعان ەش وكىنبەيمىن. ادامدارعا بارىنشا كاسىبي كومەكتەسۋگە تىرىسامىن. بۇل جاڭارعان امبۋلاتوريادا ساپالى مەديتسينالىق قىزمەت كورسەتۋگە بارلىق جاعداي جاسالعان، بارلىق قاجەتتى قۇرال-جابدىقتار بار. اۋىلداستارىما دارىگەرلىك كومەگىم تيەتىنىنە قۋانىشتىمىن، - دەيدى جاس مامان، جالپى تاجىريبە دارىگەرى ارايلىم شاحانبەكوۆا.
سونىمەن قاتار مەرەكە قارساڭىندا قاراتال، كوكسۋ، پانفيلوۆ اۋداندارىندا جالپى سانى 70 وتباسى جەكە ۇيلەرگە يە بولدى. اتاپ ايتقاندا، كوكسۋ اۋدانى جارلىوزەك جانە بالپىق بي اۋىلدارىندا 17 ءۇيدىڭ، قاراتال اۋدانى ۇشتوبە قالاسىندا 23 ءۇيدىڭ، پانفيلوۆ اۋدانىنىڭ جاركەنت قالاسىندا ەكى پاتەرلى 15 ءۇيدىڭ كىلتى تاپسىرىلدى.
- كوپ بالالى رەتىندە كەزەكتە تۇرعانمىن. بيىل كەزەگىمىز كەلىپ، ءۇيلى بولىپ جاتىرمىز. بەس بالام بار، ۇلكەنى ون جاستا، كىشىسى ءبىر جارىم جاستا. كۇيەۋىم كەربۇلاق اۋدانىنداعى تسەمەنت زاۋىتىندا جۇمىس ىستەيدى. ءوزىم بالا كۇتىمىمەن ۇيدە وتىرمىن. بالالارمەن پاتەردەن پاتەرگە كوشىپ ءجۇرۋ قارجىلىق جاعىنان دا، مورالدىق جاعىنان قيىن بولدى. ەندى ءۇيلى بولىپ، قونىستوي قۋانىشىنا جەتتىك. ءۇيىمىز ۇنادى، كەڭ، جارىق، جىلى، بالالارىمنىڭ نەسىبەسى عوي، - دەيدى جاڭا قونىس يەسى، جارلىوزەك اۋىلىنىڭ تۇرعىنى رۋقيا رايىم.