جەتىسۋ وبلىسىنداعى جازعى لاگەرلەردىڭ بىرىنەن شۋ شىقتى

تالدىقورعان. KAZINFORM - جەتىسۋ وبلىسى تەكەلى قالاسىنداعى «باستاۋ» لاگەرىنىڭ جۇمىسىنا اتا-انالار رازى ەمەس. ۇشتوبە قالاسىنىڭ تۇرعىنى ءسانيا اققۋجينانىڭ ايتۋىنشا، ول بالاسىن ءدال وسى جازعى ساۋىقتىرۋ ورىنىنا جىبەرىپتى. دەگەنمەن، 8-شىلدە كۇنى ۇلىن دەمالىس ورىنىنان الىپ كەتۋگە ءماجبۇر بولعان.

«مەنىڭ ۇلىم بۇل دەمالىستى ۇزاق كۇتتى. قۋانىپ شىعارىپ سالدىق. ءبىراق 7-شىلدە كۇنى ماعان بالام لاگەردە تاماق دۇرىس ەمەس ەكەنىن جانە ەشقانداي جاعداي جاسالماعانى جايلى ايتتى. ەش ويلانباستان ەرتەسى ەمىزۋلى بالاممەن سول جەرگە باردىم. مەنىڭ عانا بالام ەمەس، بارلىق بالالاردىڭ كوڭىلىنەن شقىپاعان. تاماق ۋاقتىلى بەرىلمەيدى. ءتىپتى، ىشتە دارەتحانا جوق. باستاۋ لاگەرىنە كوبىنەسە اتاۋلى الەۋمەتتىك كومەك الاتىن بالالار بارعان. نەگە ونداي بالالاردىڭ جاعدايىن جاسامايدى؟» - دەدى جەتىسۋ وبلىسىنىڭ تۇرعىنى سانيا اققۋجينا.

سونداي-اق، ول اتالمىش لاگەردە بالالارعا ارنالعان ويىن-ساۋىق باعدارلامالارى جۇرگىزىلمەگەنىن ايتادى. ءتىپتى، ونداعى وقۋشىلار كيىمدەرىن مۇزداي سۋعا جۋعان.

ال، بۇل ماسەلەگە قاتىستى قاراتال اۋداندىق ءبىلىم ءبولىمى بىلاي دەپ جاۋاپ بەردى:

«2024 -جىلدىڭ 19-ماۋسىمىندا 20 بالا جوسپار بويىنشا تەكەلى قالاسىنداعى «باستاۋ» جازعى ساۋىقتىرۋ لاگەرىنە جىبەرىلدى. 27-ماۋسىمدا بۇل لاگەرگە 39 بالا جىبەرىلدى. 5-شىلدەدە 60 بالا جىبەرىلدى. لاگەرگە دەمالۋعا بارعان بالالاردىڭ اتا-انالارى تاراپىنان بۇعان دەيىن شاعىم تۇسكەن جوق. وسى ۋاقىتقا دەيىن ءبىلىم ءبولىمى، اتا-انالار، مەكتەپ ديرەكتورلارى لاگەردىڭ جاعدايىن باقىلاۋعا العان. دەگەنمەن، باقىلاۋ بارىسىندا كەمشىلىكتەر بولعان جوق» - دەدى، قاراتال اۋداندىق ءبىلىم ءبولىمى.

اۆتور
ديانا تۇرلىبەك