جەتىسۋ وبلىسىندا 6 سيىر ۇرلاعان ازامات 2 جىلعا سوتتالدى

تالدىقورعان. KAZINFORM - جەتىسۋ وبلىسى قاراتال اۋداندىق سوتى ق ر قىلمىستىق كودەكىسىنىڭ 188-1- بابى، 1-بولىگى ياعني مال ۇرلىعى بويىنشا قىلمىستىق ءىستى قارادى. ايىپتالعان ازامات سوت ۇكىمىمەن 2 جىلعا سوتتالدى.

48 جاستاعى قاراتال اۋدانىنىڭ تۇرعىنى جايىلىمدا قاراۋسىز جۇرگەن ءىرى قارالاردى ءوز قوراسىنا قاماپ، ولاردىڭ قۇلاقتارىنا جاڭا تاڭبا سالعان. وسى ارقىلى قىلمىسىن جاسىرۋعا تىرىسقان. قۇقىق قورعاۋ ورگاندارى كۋاگەرلەردىڭ ايعاقتارى مەن ىزدەستىرۋ شارالارىنىڭ ناتيجەسىندە ۇرلانعان مالدى انىقتادى.

قاراتال اۋداندىق سوتىنىڭ دەرەگىنشە زالال مولشەرى 1,2 ميلليون تەڭگەدەن اسقان. (6 ءىرى قارانىڭ قۇنى)

قىلمىستىق ارەكەت ءۇشىن زاڭ بويىنشا 5 جىلعا دەيىن باس بوستاندىعىنان ايىرۋ نەمەسە بالاما جازا تۇرلەرى قاراستىرىلعان. سوتتالۋشى ءوز كىناسىن مويىنداپ، ىستەگەن ىسىنە وكىنەتىنىن ايتتى. ماتەريالدىق شىعىندى تولىعىمەن وتەدى.

«جابىرلەنۋشى سوتتالۋشىعا باس بوستاندىعىنان ايىرمايتىن جازا تاعايىنداۋدى سۇرادى. وسى ءمان-جايلاردى ەسكەرە وتىرىپ، سوتتالۋشى مال ۇرلىعىن جاساعانى ءۇشىن كىنالى دەپ تانىلىپ، وعان 2 جىلعا باس بوستاندىعىن شەكتەۋ جازاسى تاعايىندالدى»، - دەلىنگەن حابارلامادا.

ۇرلانعان مال ءوز يەسىنە قايتارىلدى. ۇكىم زاڭدى كۇشىنە ەندى.

ەسكە سالايىق بۇعان دەيىن تەكەلى قالاسىندا ءيتىن ءولتىرىپ، يەسىن ساباعان ازاماتتىڭ 1 جىلعا باس بوستاندىعىنان ايىرىلعانىن جازعانبىز.

اۆتور
ايبەك قۇتتىبەك