مينيسترلىك مالىمەتىنشە، باسسەيندىك سۋ ينسپەكسيالارى سۋ قورعاۋ ايماقتارى مەن بەلدەۋلەرىندە كارەرلەردى زاڭسىز قازۋ جانە پايدالى قازبالاردى رۇقساتسىز ءوندىرۋ فاكتىلەرىن انىقتاۋ ماقساتىندا تۇراقتى مونيتورينگ جۇرگىزىپ كەلەدى.
وسىنداي تەكسەرۋلەردىڭ بىرىندە بالقاش- الاكول باسسەيندىك سۋ ينسپەكسياسى جەتىسۋ وبلىسىنىڭ تابيعات قورعاۋ پروكۋراتۋراسىمەن بىرلەسىپ، قاراتال وزەنىنىڭ ارناسىن زاڭسىز وزگەرتۋ ارەكەتىن انىقتاعان.
تەكسەرۋ بارىسىندا ۋاكىلەتتى مەملەكەتتىك ورگاننىڭ ءتيىستى كەلىسىمىنسىز سۋ نىسانىنىڭ تابيعي ارناسىن وزگەرتۋگە اكەپ سوققان جۇمىستار جۇرگىزىلگەنى بەلگىلى بولدى.
اتالعان قۇقىق بۇزۋشىلىققا بايلانىستى كىنالى تۇلعالارعا اكىمشىلىك ىقپال ەتۋ شارالارى قولدانىلدى.
- وزەن ارناسىن زاڭسىز وزگەرتۋ سۋ نىسانىنىڭ تابيعي گيدرولوگيالىق رەجيمىنىڭ بۇزىلۋىنا، جاعالاۋلاردىڭ شايىلۋىنا جانە وعان ىرگەلەس اۋماقتاردى سۋ باسۋ قاۋپىنە اكەلۋى مۇمكىن. مۇنداي جۇمىستار قازاقستان رەسپۋبليكاسىنىڭ سۋ زاڭناماسىنىڭ تالاپتارىنا قاتاڭ سايكەس جۇرگىزىلۋى كەرەك، - دەدى سۋ رەسۋرستارى جانە يرريگاتسيا مينيسترلىگى سۋ رەسۋرستارىن رەتتەۋ، قورعاۋ جانە پايدالانۋ كوميتەتى ءتوراعاسىنىڭ مىندەتىن اتقارۋشى تەمىرلان ءابدىقۇلوۆ.
ايتا كەتەيىك، بۇعان دەيىن ەلىمىزدە وزەن ارنالارى مەن جاعالاۋلارىنان قۇم، قيىرشىقتاس جانە باسقا دا تابيعي ماتەريالداردى زاڭسىز ءوندىرۋ سۋ ەكوجۇيەلەرىنە كەرى اسەر ەتەتىنى حابارلانعان ەدى. سۋ رەسۋرستارى جانە يرريگاتسيا مينيسترلىگىنىڭ مالىمەتىنشە، 2025 -جىلى جانە 2026 -جىلدىڭ العاشقى توعىز ايىندا سۋ قورعاۋ ايماقتارىندا جەر قويناۋىن زاڭسىز پايدالانۋعا بايلانىستى 8 ميلليون تەڭگەدەن استام ايىپپۇل سالىنعان.