جەتىسۋ تۇرعىنى بال ساتاتىن وسكەمەندىكتى الداپ، 100 مىڭ دوللار شىعىنعا باتىردى
وسكەمەن. KAZINFORM - وسكەمەن قالالىق 2-سوتىندا اسا ءىرى كولەمدەگى الاياقتىق بابى بويىنشا قىلمىستىق ءىس قارالدى.
بال ساتۋمەن اينالىساتىن وسكەمەندىك ءوز ءونىمىن قايتا وڭدەۋگە ارنالعان جابدىق ساتىپ الماق بولادى. ءسويتىپ، قاجەتتى تەحنيكانىڭ قىتايدا بار ەكەنىن تانىسىنان ەستيدى. ول بولسا جابدىقتىڭ الدىن الا تولەمىن جەتىسۋ وبلىسىندا تۇراتىن باسقا ءبىر تانىسى ارقىلى جىبەرۋ قاجەتتىگىن ايتادى.
جەتىسۋ تۇرعىنى وسكەمەنگە كەلىپ، كاسىپكەردەن 100 مىڭ دوللاردان استام قاراجاتتى العان. وزىنە سەندىرۋ ءۇشىن قىتايلىق دەلدالمەن بەينەقوڭىراۋ ارقىلى بايلانىس ورناتقان. الايدا ارادا ءبىرشاما ۋاقىت وتكەندە جابدىقتى جەتكىزگەننىڭ ورنىنا، حابار-وشارسىز كەتەدى.
- سوت بارىسىندا انىقتاعانداي، ول قارجىنى جەكە قاجەتتىلىكتەرىنە جۇمساپ تاستاعان. ونىڭ قايدا جۇرگەنى ۇزاق ۋاقىت بەلگىسىز بولدى. سوتتا ايىپتالۋشى ءوز كىناسىن مويىنداۋدان باس تارتتى. دەسە دە تەرگەۋ كەزىندە ءىس بويىنشا قولحاتتار، اۋديو جانە بەينەماتەريالدار، كۋاگەرلەردىڭ ايعاقتارى جينالعان، - دەپ حابارلادى سوتتىڭ باسپا ءسوز قىزمەتىنەن.
سوت ۇكىمىمەن سوتتالۋشى اسا ءىرى كولەمدەگى الاياقتىق جاساعانى ءۇشىن كىنالى دەپ تانىلىپ، 5 جارىم جىلعا باس بوستاندىعىنان ايىرىلدى. سونىمەن قاتار ول جابىرلەنۋشىگە كەلتىرىلگەن ماتەريالدىق زالالدى وتەۋگە مىندەتتەلدى.