«جەتى اتاسىن بىلمەگەن - جەتىمدىكتىڭ بەلگىسى». جەتى اتاسىن ۇعىندىرۋ

استانا. KAZINFORM - مادەنيەت جانە ۇلتتىق سالت- ءداستۇر كۇنىنە وراي Kazinform اگەنتتىگى نازارلارىڭىزعا ۇلتىمىزدىڭ تال بەسىكتەن جەر بەسىككە دەيىنگى عۇمىرىنداعى ماڭىزدى سالت-داستۇرلەرىن ۇسىنادى.

جەتى اتاسىن ۇعىندىرۋ

قازاق سالتى بويىنشا، ءاربىر وتباسى ءوز پەرزەنتتەرىنە جاستايىنان جەتى اتاسىن ۇعىندىرۋى شارت. ولاي بولاتىنى، قازاق بالالارىنىڭ وڭ-سولىن تانىعانعا دەيىن جەتى اتاسىن بىلمەۋى ۇلكەن ايىپ سانالادى.

«جەتى اتاسىن بىلمەگەن - جەتىمدىكتىڭ بەلگىسى» دەپ، اتا- اناسى ءتىرى تۇرىپ، اتا تەگىن بىلمەۋدى ابەستىك دەپ بىلەدى. «جەتى اتاسىن بىلگەن ۇل - جەتى جۇرتتىڭ قامىن جەر» دەپ، جەتى اتاسىن ءبىلۋدى وتە جوعارى باعالايدى. ولاي بولاتىنى، قازاق حالقى جەتى اتاعا دەيىنگى بارلىق ادامدى ءوزىنىڭ ەت جاقىن تۋىسى ەسەپتەيتىندىكتەن، جەتى اتاسىن قانىق بىلگەن جاس ۇرپاق كىمنىڭ جاقىن، كىمنىڭ الىس ەكەنىنەن ەرتەرەك حاباردار بولادى دا، قىز الىپ، قىز بەرۋ، قىز ايتتىرىپ، جار تاڭداۋ ىستەرى مەن توي-تومالاق، ءولىم- ءجىتىم ۇزاتۋ سياقتى بۇقارالىق قيمىلدار دا ۇياتتى ىستەردەن اۋلاق بولادى.

تۋىستار اراسىنداعى سۇيىسپەنشىلىكتەرىن ارتتىرىپ، ەل-جۇرتى مەن تۋىس- تۋعاندارىنىڭ قامىن جەپ، مۇڭىن مۇڭداپ، جوعىن جوقتايتىن حالىقشىل ازامات بولىپ جەتىلۋگە داعدىلاندىرادى. سوندىقتان دا ءار وتباسى ۇرپاقتارىنا كەم دەگەندە اكەسىنىڭ، اتاسىنىڭ، ارعى اتاسىنىڭ، باباسىنىڭ، ءتۇپ اتاسىنىڭ، تەكاتاسىنىڭ اتتارىن جاتتاتقىزىپ، تۋىستىق قارىم- قاتىناس جولدارىن ۇرپاقتارىنا تولىق ۇيرەتۋدى باس تارتپاس پارىزى ساناعان.

ماتەريال ايىپ ءنۇسىپوقاس ۇلىنىڭ «تال بەسىكتەن جەر بەسىككە دەيىن» اتتى كىنابىنا نەگىزدەلىپ دايىندالدى.

اۆتور

ريزابەك نۇسىپبەك ۇلى