جۇسىپبەك ايماۋىتوۆ اشقان كەشەننىڭ ورنىنا بەلگىتاس قويىلدى

پاۆلودار. KAZINFORM - الاش قايراتكەرى جۇسىپبەك ايماۋىتوۆ باياناۋىل اۋدانىندا «مادەني كىندىك» اتتى رۋحاني تاربيە جانە ءبىلىم بەرۋ كەشەنىن اشۋعا ۇيىتقى بولعان. قازاق دالاسىن جۇت جايلاپ، جەتىم-جەسىر كوبەيگەندە جۇسىپبەكتىڭ ايتۋىمەن ەلدىڭ باس كوتەرەر ازاماتتارى بالالاردى قىزىلتاۋ وڭىرىنە جيناپتى. بۇل تۋرالى 24.kz حابارلادى.

مادەني كىندىكتە اۋەلى مەكتەپ عيماراتى، كەيىن قىزدار مەن ەر بالالاردىڭ جاتاقحاناسى، كىتاپحانا مەن ازىق-تۇلىك ساقتايتىن بىرنەشە قويما سالىنعان ەكەن. بيىل جۇسىپبەك ايماۋىتوۆتىڭ تۋعانىنا 135 جىل تولدى. وسىعان وراي «مادەني كىندىك» ورنالاسقان جەرگە بەلگىتاس قويىلدى. جۇسىپبەك ايماۋىتوۆ سەمەي گۋبەرنيالىق وقۋ بولىمىندە قىزمەت ەتە ءجۇرىپ، باياناۋىل اۋماعىندا مەكتەپ اشۋ تۋرالى يدەيا تاستايدى. بۇل كەڭەس ۇكىمەتى ورناپ، مەدرەسەلەردىڭ جاپپاي جابىلعان كەزى بولاتىن. قولىندا مالى بار اۋقاتتى ادامداردىڭ كومەگىمەن وقۋ قالاشىعى پايدا بولادى. ىرگەسى 2 جىلدا قالانىپ، 10 جىلعا جۋىق قىزمەت ەتكەن وقۋ ورداسىنىڭ تۇلەكتەرى بىلىمدەرىن ورىنبوردا جالعاستىرادى.

- 1922 -جىلدىڭ جازىندا ءبىرىنشى وقۋ باستالعان ەكەن، 1929 -جىلعا دەيىن ىستەپ، 1928 -جىلى جۇسىپبەك ايماۋىتوۆ الاش وردا مۇشەسى رەتىندە ۇستالعاننان كەيىن وسى كىسى الاش يدەياسىن وقىتىپ جاتىر دەگەن جەلەۋمەن بۇل جەردىڭ مەكتەبىنىڭ بىرتە-بىرتە ءمانى جوعالىپ، مۇعالىمدەردىڭ بارلىعى قۋدالاۋعا تۇسكەننەن كەيىن ول كىسى كەتىپ قالعاندا دارەجەسى تومەندەپ، اۋەلى باستاۋىش مەكتەپكە تۇسكەن. رامازان نۇرعاليەۆتىڭ ايتۋىنشا، وقۋ كەشەنى كوپ ۇزاماي جۇمىسىن ءبىرجولاتا توقتاتادى. بوس قالعان عيماراتتار سيىر، قوي فەرمالارىنا اينالادى. ال 1954 -جىلى وندا تىڭ يگەرۋگە كەلگەن بريگادالار قونىستانادى، - دەيدى باياناۋىل اۋدانىنىڭ تۇرعىنى رامازان نۇرعاليەۆ.

«مادەني كىندىك» وقۋ قالاشىعىنا بەلگىتاس قويۋ تۋرالى ۇسىنىس جۇسىپبەك ايماۋىتوۆتىڭ 130 جىلدىعىندا تۇسكەن. جۇسىپبەك وقۋلارىنا كەلگەن عالىمدار تاريحي جەردى ارالاعان.

بۇقار جىراۋ اتىنداعى ادەبيەت جانە ونەر مۋزەيىنىڭ قىزمەتكەرلەرى اتالعان بەلگىتاستىڭ ماكەتىن جاساعان.

- بۇل بىزگە وتە ءبىر سونداي تاماشا جاڭالىق بولدى دەپ ويلايمىن. مۇنى باسىندا ءبىز ەستىگەنبىز. دەگەنمەن دە قاي جەر ەكەنىن بىلگەنىمىز جوق. ەندى جاڭا بىزگە كورسەتىپ وتىرسا، مەكتەپتىڭ ورنى، جاڭاعى بارلىق مىنا دومبەشىكتەردىڭ بارلىعى جاتاقحانا، اكىمشىلىك، جەرتولە، قويمادا بولعان ەكەن عوي. سونىڭ ءبارىن قولدان ىستەگەن، سول جەرگە تاماقتارىن قويعان عوي. بارلىعى رەتتەپ ىستەلگەن، كوردىڭىز بە؟ ونىڭ ءوزى - تاريحي قۇندىلىق، - دەيدى ج. ايماۋىتوۆ اتىنداعى جالپى ورتا ءبىلىم بەرۋ مەكتەبى ديرەكتورىنىڭ ورىنباسارى سالتانات سارسەنباي قىزى.

جۇسىپبەك ايماۋىتوۆ مەكتەبىنىڭ ۇستازدارى مەن وقۋشىلارى: «مادەني كىندىك» تۋرالى زەرتتەۋ جۇمىستارىن باستاماقشى. ولار عىلىمي ەڭبەكتەرگە ارقاۋ بولاتىن تىڭ دەرەكتەر تابىلادى دەگەن سەنىمدە.