جۇرگىزۋشىسىز جاڭا ەنەرگەتيكالىق كولىكتەر كەندە جۇمىس ىستەۋدە - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
ورتالىق ازيا ەلدەرىنىڭ جۋرناليستەرى تاشكەنتتە باس قوستى - «ءوز ا»
تاشكەنت قالاسىندا شانحاي ىنتىماقتاستىق ۇيىمىنىڭ (ش ى ۇ) قوعامدىق ديپلوماتيا ورتالىعى، وزبەكستان جۋرناليستەر وداعى، وزبەكستان ۇلتتىق ب ا ق قاۋىمداستىعىمەن بىرلەسىپ «ورتالىق ازيا داۋىسى»: ۇلتتىق كەڭىستىكتەن ايماقتىق كەڭىستىككە» تاقىرىبىندا ورتالىق ازيا ەلدەرى جۋرناليستەرىنىڭ كەزدەسۋى ءوتتى، دەپ حابارلايدى «ءوز ا» اقپارات اگەنتتىگى.
قازاقستان، قىرعىزستان جانە تاجىكستان ەلدەرىنىڭ ب ا ق وكىلدەرى قاتىسقان شارادا قوناقتار وزبەكستان ۇلتتىق تەلەراديوكومپانياسىنىڭ تاريح مۇراجايىنىڭ جادىگەرلەرىن تاماشالادى.
وزبەكستاندىق مەديا ورتالىقتا تەلەارنالار، سونىڭ ىشىندە «وزبەكستان تاريحى» تەلەارناسى ءۇشىن ءتۇرلى باعدارلامالار مەن شوۋلار تۇسىرۋگە ارنالعان ستۋديالارداعى جۋرناليستەر مەن تەحنيكالىق قىزمەتكەرلەرگە جاسالعان جاعدايمەن تانىستى.
سونداي-اق، «ءوز ا» - دا «وزبەكستان مەن قازاقستان شەكارادان ازاماتتاردى ID كارتا ارقىلى وتكىزۋدى تالقىلاپ جاتىر» دەگەن تاقىرىپتاعى اقپارات جاريالاندى.
وزبەكستان مەن قازاقستاننىڭ رەسمي ۆەدومستۆولارى ەكى ەل ازاماتتارىنىڭ مەملەكەتتىك شەكارادان ۇلتتىق جەكە كۋالىك (ID كارتا) ارقىلى وتۋىنە رۇقسات بەرۋ ماسەلەسىن تالقىلاپ جاتىر.
«بۇل تۋرالى وزبەكستان پرەزيدەنتىنىڭ سىرتقى ساياسات جونىندەگى ارنايى وكىلى ابدۋلازيز كوميلوۆتىڭ «جاڭا وزبەكستان» گازەتاسىندا جاريالاعان ماقالاسىندا ايتىلعان»، دەپ جازادى وزبەستاندىق ب ا ق.
ساياساتكەر استانا قالاسىندا وتكەن ورتالىق ازيا ەلدەرى باسشىلارىنىڭ التىنشى كونسۋلتاتيۆتىك كەزدەسۋى ايماقتاعى بارلىق ەلدەردىڭ كەيىنگى التى جىلداعى كەزەكتى ءتوراعالىعىنىڭ ناتيجەسىن سيمۆولدى قورىتىندىسى بولعانىن ايتىپ، بۇل فورمات مەملەكەتارالىق ىنتىماقتاستىقتىڭ جاڭا كەزەڭىن باستاپ بەرگەنىن مالىمدەگەن.
ابدۋلازيز كوميلوۆ ءوز ماقالاسىندا، بۇگىندە وزبەكستان مەن ورتالىق ازيا ەلدەرى اراسىنداعى شەكارانى دوستىق پەن تاتۋ كورشىلىك كوپىرى دەپ اتاۋعا بولادى. 2023 -جىلدىڭ 1-قىركۇيەگىنەن باستاپ وزبەكستان- قىرعىزستان شەكاراسىنان وتۋدە ازاماتتار ID كارتانى پايدالانۋدا. ءدال وسىنداي جوبا قازاقستانمەن دە تالقىلانۋدا ەكەنىن جازعان.
يراننىڭ توقىما ونەركاسىبى كورمەسىنە 120 شەتەلدىك كومپانيا قاتىسادى - «Parstoday»
يراننىڭ توقىما ونەركاسىبىنىڭ 30-شى كورمەسى تەھران حالىقارالىق كورمەلەرىنىڭ تۇراقتى ورنىندا 13 ەلدەن 170 يراندىق كومپانيا مەن 120 شەتەلدىك كومپانيانىڭ قاتىسۋىمەن باستالدى، دەپ حابارلايدى يراننىڭ «Parstoday» اقپارات اگەنتتىگى.
يراندىق ب ا ق-تىڭ مالىمەتىنشە، 29-مۋرداد (19-تامىز) تەھران حالىقارالىق كورمەلەرىنىڭ تۇراقتى ورنىندا باستالعان يراننىڭ توقىما ونەركاسىبىنىڭ، سونىڭ ىشىندە ماشينا جاساۋ، شيكىزات، ءۇي توقىما بۇيىمدارى، كەستە تىگۋ ماشينالارى مەن توقىما بۇيىمدارىنىڭ 30-كورمەسى شاحريۆاردىڭ 1-ىنە (22-تامىز) دەيىن جالعاسادى.
بۇل كورمەگە گەرمانيا، يتاليا، تايۆان، وزبەكستان، تاجىكستان، وڭتۇستىك كورەيا، تۇركيا، پاكىستان، اۆستريا، شۆەيتساريا، ءۇندىستان، جاپونيا جانە قىتايدان كەلگەن قاتىسۋشىلار توقىما ونەركاسىبى سالاسىنداعى سوڭعى ونىمدەرى مەن قىزمەتتەرىن ۇسىنادى.
اتالعان حالىقارالىق باسقوسۋعا 290-نان استام يراندىق جانە شەتەلدىك كومپانيالار ءوز مۇمكىندىكتەرىن تانىستىرۋ، ينۆەستيسيا، ساۋدا جانە ساۋدا الماسۋلارىن قامتاماسىز ەتۋ جانە وسى سالانىڭ جاڭا مالىمەتتەرىن ءبىر- بىرىمەن تالقىلاپ، الماسۋ ءۇشىن جينالدى.
سونداي- اق وسى اپتادا «Parstoday» اقپارات اگەنتتىگىندە «يراننىڭ Pars حالىقارالىق فوتو فەستيۆالىنە 63 ەلدەن فوتوگرافتار قاتىسادى» دەگەن تاقىرىپتاعى اقپارات جارىق كورگەن بولاتىن.
Pars حالىقارالىق فوتوفەستيۆالىنىڭ ءبىرىنشى كەزەڭى مادەنيەت پەن ونەردى قولداۋ سالاسىنداعى الەۋمەتتىك جاۋاپكەرشىلىك رولىنە سايكەس فوتوسۋرەت ونەرىن دامىتۋ، دارىندى جاستار مەن سۋرەتشىلەردى قولداۋ يراننىڭ پارس ايماعىنىڭ مۇمكىندىكتەرىن تانىستىرۋ ماقساتىمەن قىركۇيەك ايىندا وتپەك.
Pars حالىقارالىق فوتوفەستيۆالىنىڭ جاۋاپتى حاتشىسى رەزا ميرمەحرابيدىڭ ايتۋىنشا، بۇل شارا ءۇش سەكتوردا وتەدى: مۇناي ونەركاسىبى، وتباسى، ەكولوگيا جانە تۋريزم جانە 63 ەلدىڭ فوتوگرافتارىن قارسى الادى. فەستيۆالگە تۇسكەن جۇمىستاردى باعالاۋدان كەيىن ءارتۇرلى سەكتسيالاردىڭ جەڭىمپازدارى انىقتالادى. كورمەنىڭ اشىلۋىمەن ءبىر ۋاقىتتا شاحريۆارداعى سالتاناتتى شارادا تاڭدالعان جۇمىستار تانىستىرىلىپ، باعالانادى.
كەندە جۇرگىزۋشىسىز كولىكتەر جۇمىس ىستەپ ءجۇر - «حالىق گازەتى»
جاقىندا حولين-گول قالاسىندا ۇلتتىق ەلەكتر ەنەرگەتيكاسى ينۆەستيتسيالىق توبى ىشكى موڭعول كومپانياسىنىڭ (spic）وڭتۇستىك اشىق كومىر كەنى 35 جاڭا 100 توننالىق ەنەرگەتيكالىق جۇرگىزۋشىسىز تاۋ-كەن جۇك كولىگىن ەنگىزدى، دەپ حابارلايدى قىتايلىق «حالىق گازەتى» باسىلىمى.
قىتايلىق باسىلىمنىڭ مالىمەتىنشە، ولاردىڭ وتىن ۇنەمدەۋى دان 0 عا دەيىن جەتەدى.
«ال ءاربىر جۇرگىزۋشىسىز كولىك جىل سايىنعى كومىرقىشقىل گازىنىڭ شىعارىندىلارىن 100 توننا ازايتادى. سونىمەن قاتار جۇرگىزۋشىسىز تاسىمالداۋ جۇيەسى جەرگىلىكتى جۇمىس جۇرگىزەتىن قىزمەتكەرلەرگە سۇرانىستى ازايتىپ، بۇكىل شاحتانىڭ وندىرىستىك قاۋىپسىزدىگىن جاقسارتادى»، دەپ جازدى قىتايلىق ب ا ق.
سونداي-اق، وسى اپتادا «حالىق گازەتى» باسىلىمىندا «قازاق دارىگەرى قىتايداعى «ەڭ ۇزدىك دارىگەر» اتاعىن الدى» دەگەن اقپارات جاريالاندى.
19-تامىزداعى قىتاي دارىگەرلەرى كۇنىنە وراي ورتالىق ۇگىت-ناسيحات باسقارماسى مەن ۇلتتىق دەنساۋلىق ساقتاۋ كوميتەتى 2024 -جىلعى «ەڭ ۇزدىك دارىگەرلەردىڭ» ءتىزىمىن جاريالادى. قازاق دارىگەرى ءماۋلىشارىپ قاپا ۇزدىك دەپ تاڭدالدى، دەپ حابارلايدى قىتايدىڭ «حالىق گازەتى».
قىتايلىق ب ا ق-تىڭ دەرەگىنشە، ءماۋلىشارىپ قاپا شينجاڭنىڭ بۋرىلتوعاي اۋدانىنداعى اۋىلدىڭ زەينەتكەر دارىگەرى.
ول 40 جىل بويى شارۋاشىلىق ءوڭىرىنىڭ تۇكپىر-تۇكپىرىن ارالاپ، ءدارى-دارمەك پەن دارىگەرلىك قىزمەتىن ەم الۋشىلاردىڭ وتباسىنا دەيىن جەتكىزگەن.
م. قاپا جۇمىس بابىمەن جۇرگەندە شينجاڭنىڭ بۋرىلتوعاي اۋدانىنداعى ەلدى مەكەندەردى ارالاپ، ءاربىر مالشى وتباسىمەن تانىسقان.
ءماۋلىشارىپ قاپا 1975 -جىلى شينجاڭ حالىقتىق قىتاي مەديتسينا مەكتەبىن بىتىرگەننەن كەيىن بۋرىلتوعاي اۋدانىنداعى جۇمىسىن اتقارعان 47 جىلدا ول ءوزىنىڭ تاماشا دارىگەرلىك شەبەرلىگىمەن جانە كاسىبي ەتيكاسىمەن حالىقتىڭ قۇرمەتىنە بولەنگەن.
ول تەك ءوز كاسىبىمەن عانا اينالىسىپ قويماي، قوعامدىق جۇمىستارعا دا بەلسەنە ارالاسقان.
اتاپ ايتقاندا، 1992 -جىلدان 2022 -جىلعا دەيىنگى 30 جىل ىشىندە بۋرىلتوعاي اۋدانىنىڭ ءبىلىم بەرۋ سالاسىنا 700000 يۋاننان جوعارى قارجى اۋدارىپ، 500-دەن استام مەكتەپتى تاستاپ كەتكەن بالانىڭ وقۋعا قايتا ورالۋىنا كومەكتەسكەن. سونداي-اق 36 كەدەي وقۋشىنىڭ وقۋىن تولىق اياقتاۋىنا قارجىلىق جاقتان قول ءۇشىن سوزعان.
ايتا كەتەيىك، ءماۋلىشارىپ قاپا كوپ جىل بۇرىن زەينەتكە شىققانىمەن ءالى دە اۋىلداستارىنىڭ سىرقاتىن ەمدەپ كەلەدى.
تۇركيا مۇناي مەن تابيعي گاز وندىرىسىندە رەكورد جاڭالادى - TRT
ەنەرگەتيكا جانە تابيعي رەسۋرستار مينيسترلىگى جاساعان جازباشا مالىمدەمەدە مينيستر الپارسلان بايراكتار 2024 -جىلدى مۇناي جانە تابيعي گاز ءوندىرىسىن ارتتىرۋ جىلى دەپ جاريالادى. وعان سەبەپ تۇركيادا وسى ايدا مۇناي مەن تابيعي گازدىڭ كۇندەلىكتى ءوندىرىس رەكوردتارى جاڭارعان.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
ا. بايراكتاردىڭ ايتۋىنشا، كوزدەگەن ماقساتقا قاراي ىلگەرىلەۋشىلىك بار. تامىز ايىندا مۇناي مەن تابيعي گاز ءوندىرۋ تاريحتاعى ەڭ جوعارى دەڭگەيگە جەتكەن. 17-تامىزدا شيكى مۇناي ءوندىرۋ 107 مىڭ 621 باررەل بولدى. بۇل ءوندىرىستىڭ 95 مىڭ 656 باررەلى تۇرىك مۇناي اكتسيونەرلىك قوعامى جۇزەگە اسىردى. ءدال سول كۇنى تۇركيا گابار تاۋىنداعى ۇڭعىمالاردان 47 مىڭ 58 باررەل ءوندىرۋ كورسەتكىشىنە جەتتى.
سونداي- اق، ۇلتتىق ەنەرگەتيكا جانە تاۋ-كەن ساياساتى اياسىندا تۇركيانىڭ ءوز كەمەلەرى، ينجەنەرلەرى جانە قوندىرعىلارىمەن ەنەرگياداعى سىرتقى تاۋەلدىلىكتى جويۋعا ۇلكەن تاباندىلىقپەن قادام باسىپ كەلە جاتىر.
اۆتور
بەيسەن سۇلتان ۇلى