جۇرگىزۋشى قۇقىعىنان ايىرىلعانىنا قاراماستان كولىك باسقارعان 1,5 مىڭ ادام ۇستالدى – ءى ءى م

استانا. KAZINFORM - جۇرگىزۋشى قۇقىعىنان ايىرىلعانىنا قاراماستان كولىك باسقارعان 1,5 مىڭ ادام ۇستالدى. بۇل تۋرالى ءى ءى م اقپاراتتىق ساياسات دەپارتامەنتىنىڭ باسقارما باستىعى باۋىرجان ماكسيموۆ ءمالىم ەتتى.

«رەسپۋبليكا بويىنشا «ۋچاسكە» جانە «قۇقىقتىق ءتارتىپ» كەڭ اۋقىمدى جەدەل-الدىن الۋ ءىس-شارالارى جۇرگىزىلىپ، وعان 16 مىڭنان استام پوليتسيا قىزمەتكەرى مەن ۇلاندىقتار جۇمىلدىرىلدى. ءۇش كۇن ىشىندە 1260 قىلمىس تىركەلدى. ونىڭ 858- ءى كەزەكشى تاۋلىكتە اشىلدى. تىيىم سالىنعان زاتتاردى زاڭسىز ساقتاعانى جانە الىپ جۇرگەنى ءۇشىن 180 ادام، ونىڭ ىشىندە 78- ءى ەسىرتكى ءۇشىن، 54- ءى اتىس قارۋى ءۇشىن، 31- ءى سۋىق قارۋ ءۇشىن ۇستالدى. ەسەپتە تۇرعان 39 مىڭنان استام ادام تەكسەرىلدى. ولارعا قويىلعان شەكتەۋلەردىڭ 392 رەت بۇزىلعانى انىقتالدى»، - دەدى باسقارما باستىعى مينيسترلىكتە وتكەن بريفينگتە.

ونىڭ دەرەگىنشە، ءۇش كۇن ىشىندە 9 مىڭنان استام قاراۋسىز قالعان ءۇي، 17 مىڭنان استام ساياجاي جانە 13 مىڭعا جۋىق پاتەر تەكسەرىلدى.

«29 مىڭنان استام اكىمشىلىك قۇقىق بۇزۋشىلىقتىڭ جولى كەسىلدى. ولاردىڭ ىشىندە ۇساق بۇزاقىلىقتىڭ – 547، الكوگولدىك ىشىمدىكتەردى ءىشۋدىڭ نەمەسە قوعامدىق ورىنداردا ماس كۇيدە ءجۇرۋدىڭ – 3300، تىنىشتىقتى بۇزۋدىڭ – 1245، قورعاۋ نۇسقامالارىن بۇزۋدىڭ – 152، اكىمشىلىك قاداعالاۋدى بۇزۋدىڭ – 63، قارسى جولاققا شىعۋدىڭ – 201، كولىك قۇرالىن ماس كۇيىندە باسقارۋدىڭ 274 فاكتىسى بار. 4390 جاياۋ جۇرگىنشى ەرەجە بۇزعان. سونىمەن قاتار، 1,5 مىڭ ادام جۇرگىزۋشى قۇقىعىنان ايىرىلعانىنا قاراماستان كولىك باسقارعان»، - دەدى باۋىرجان ماكسيموۆ.

اۆتور

مارلان جيەمباي