جۇرگىزۋشى كۋالىگى: قازاقستاندا ەمتيحان تاپسىرۋ كەزىندە جاڭا ەرەجە ەنگىزىلمەك
استانا. KAZINFORM - «ازاماتتارعا ارنالعان ۇكىمەت» مەملەكەتتىك كورپوراتسياسى جۇرگىزۋشى كۋالىگىنە تەوريالىق ەمتيحان تاپسىرۋدىڭ جاڭا ءراسىمىن ەنگىزبەكشى. ەندى بولاشاق جۇرگىزۋشىلەر ەكى فاكتورلى اۋتەنتيفيكاتسيادان ءوتۋى كەرەك.
بۇل تۋرالى قاراعاندى وبلىستىق اكىمدىگىنىڭ باسپا ءسوز قىزمەتى ءمالىم ەتتى.
جاڭا تالاپقا ساي ەمتيحان تاپسىرۋشىلار ەكى فاكتورلى اۋتەنتيفيكاتسيادان وتەتىن بولادى. بۇل جەكە تۇلعانى راستاۋدىڭ ەكى ءتۇرلى ءادىسىن قامتۋ ءتاسىلى: ءبىرىنشىسى - SMS ارقىلى، ەكىنشىسى - بيومەتريالىق سايكەستەندىرۋ.
«تەستىلەۋ باستالار الدىندا كورسەتىلەتىن قىزمەتتى الۋشىعا 1414 نومىرىنەن دەربەس دەرەكتەرگە قول جەتكىزۋگە سۇراۋ سالۋ حابارلاماسى كەلىپ تۇسەدى. ايتا كەتەيىك، SMS ەلەكتروندىق ۇكىمەت پورتالىنىڭ جەكە كابينەتىندە تىركەلگەن تەلەفون نومىرىنە جىبەرىلەدى»، - دەلىنگەن حابارلامادا.
اۆتوريزاتسيادان ءساتتى وتكەننەن كەيىن جۇرگىزۋشىگە ۇمىتكەر بيومەتريالىق سايكەستەندىرۋدەن ءوتۋى كەرەك.
جاڭاشىلدىق بۇگىننەن باستاپ كۇشىنە ەندى، ءبىراق ازىرگە تەك استانادا. ەلىمىزدىڭ بارلىق مامانداندىرىلعان ح ق ك و- لارىندا جاڭا ءراسىمدى ەنگىزۋدى جىل سوڭىنا دەيىن اياقتاۋ جوسپارلانۋدا.
ەكى فاكتورلى اۋتەنتيفيكاتسيا ەمتيحاندارداعى بۇزۋشىلىقتاردىڭ سانىن ازايتۋعا كومەكتەسۋى كەرەك.