جۇرەگىم اۋىرىپ وتىر - دەمەۋ جادىرايەۆتىڭ باپكەرى تورەشىلىككە نارازىلىعىن ءبىلدىردى

استانا. INFORMSPORTS - جاپونيادا ءوتىپ جاتقان ⅩⅩ جازعى ازيا ويىندارىندا گرەك-ريم كۇرەسىنەن سىنعا تۇسكەن دەمەۋ جادىرايەۆتىڭ بەلدەسۋى الەۋمەتتىك جەلىدە قىزۋ تالقىلاندى. قازاقستاندىق بالۋاننىڭ جەكە باپكەرى بورانبەك قوڭىراتوۆ تورەشىلەر شەشىمىنە قاتىستى پىكىر ءبىلدىردى

فوتو: ۇ و ك

77 كەلىگە دەيىنگى سالماقتا سىنعا تۇسكەن دەمەۋ جادىرايەۆ جاپونيالىق بالۋانمەن بەلدەستى. كەزدەسۋ بارىسىندا قازاقستاندىق سپورتشىعا بەرىلگەن ۇپايلارعا قاتىستى جانكۇيەرلەر اراسىندا ءتۇرلى پىكىر ايتىلدى.

دەمەۋدىڭ جەكە باپكەرى بورانبەك قوڭىراتوۆ ازيا ويىندارىنا بارماعانىن جانە شاكىرتىنىڭ بەلدەسۋىن سىرتتاي باقىلاعانىن جەتكىزدى.

«مەن جاپونياعا بارعان جوقپىن. مۇنداي جارىستارعا كۆوتا بولىنەدى. ۇلتتىق قۇرامانىڭ ءبىرىنشى، ەكىنشى، ءۇشىنشى ءنومىرلى باپكەرلەرى بارادى. ال مەن دەمەۋدىڭ جەكە باپكەرى بولعاندىقتان، بارا المادىم. قازىر جۇرەگىم اۋىرىپ، قاتتى قينالىپ وتىرمىن. دەمەۋ بابىندا بولدى، جاقسى كۇرەستى. تورەشىلەردىڭ باعالاۋىنا كوڭىلىم تولمايدى. مەنىڭشە، دەمەۋدە باسىمدىق بولعان ەدى. بەلدەسۋدىڭ جانىندا بولماعان سوڭ، شاكىرتىمە نۇسقاۋ دا بەرە المادىم. بەلدەسۋدى كوزبەن كورىپ، جانىندا بولعان ادامدار ءوز تورەلىگىن ايتار»، - دەدى بورانبەك قوڭىراتوۆ.

ايتا كەتەيىك، گرەك-ريم كۇرەسىنەن جارىستار اياقتالدى. قازاقستان قۇراماسى بۇل باسەكەدە ءبىر جۇلدەگە قول جەتكىزدى. 67 كەلىگە دەيىنگى سالماقتا مەيىرجان شەرماحانبەت قولا مەدال يەلەندى.