جەرورتا تەڭىزى نورمادان تىس جىلىدى

استانا. KAZINFORM - بيىلعى ماۋسىمدا جەرورتا تەڭىزىنىڭ كەيبىر اۋداندارىندا سۋ تەمپەراتۋراسى ماۋسىمدىق نورمادان بەس گرادۋستان استام جوعارى بولدى، دەپ حابارلايدى DW.

1-شىلدەدە ەڭ جوعارى تەمپەراتۋرا 29,85 گرادۋس تىركەلدى، تەڭىز اسىرەسە بالەار ارالدارىنا جاقىن جەردە، يسپانيانىڭ جەرورتا تەڭىزى جاعالاۋىندا جانە فرانسيانىڭ وڭتۇستىگىندە قاتتى قىزدى. مۇنداي كورسەتكىش ادەتتە جازدىڭ باسىندا ەمەس، ماۋسىمنىڭ ناعىز قىزعان كەزىندە تىركەلەتىن، دەپ حابارلايدى DW Der Spiegel باسىلىمىنا سىلتەمە جاساپ.

عالىمدار رەكوردتىق كورسەتكىشتەردىڭ - 2022 جانە 2023-جىلدارى جاڭارتىلعانىنا جانە جىلىنۋدىڭ «ۇزاققا» سوزىلعانىنا الاڭداۋشىلىق ءبىلدىردى.

ايتۋلارىنشا، بۇل بۇكىل ايماققا كەرى اسەر ەتۋى مۇمكىن. وسىلايشا، ادەتتەن تىس جىلىنۋ تەڭىز ەكوجۇيەسى ءۇشىن قاۋىپتى: كەيبىر تۇرلەر جويىلادى، باسقالارىنىڭ تىرشىلىگىنە قاۋىپ تونەدى، مارجانداردىڭ، تەڭىز جاندىكتەرىنىڭ جاپپاي قىرىلۋىنا اكەلۋى مۇمكىن. بالىقتاردىڭ قونىس اۋدارۋىنا نەمەسە پوپۋلياتسياسىنىڭ جويىلىپ كەتۋىنە بايلانىستى بالىق اۋلاۋ سالاسى اقساپ قالادى.

كوپەرنيك جيناعان جانە مەتەو-فرانسيا تالداعان مالىمەتتەرگە سايكەس، جەرورتا تەڭىزىنىڭ بەتكى تەمپەراتۋراسى 29-ماۋسىمدا 26,01 گرادۋسقا جەتكەن. سونداي-اق، قازىر تەمپەراتۋرا ورتاشادان 3 گرادۋستان جوعارى، فرانسيا مەن يسپانيا جاعالاۋىنداعى كەيبىر اۋدانداردا ارتىق كورسەتكىش 4 گرادۋسقا جەتەدى.

جەرورتا تەڭىزى الەم بويىنشا «كليمات وزگەرىسىنىڭ ىستىق نۇكتەلەرىنىڭ» ءبىرى سانالادى.

بۇعان دەيىن قازاقستان مەن فرانسيا ۇكىمەتى اراسىنداعى جاھاندىق جىلىنۋعا قاتىستى كەلىسىم راتيفيكاتسيالانعانىن جازعان ەدىك.