جەرورتا تەڭىزى ەلدەرىن اپتاپ ىستىق پەن ورمان ءورتى شارپىدى

استانا. KAZINFORM - جەرورتا تەڭىزى ايماعىنداعى ەلدەردە اپتاپ ىستىق پەن ورمان ورتتەرى بەلەڭ الدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

مەتەورولوگيالىق مالىمەتتەرگە سايكەس، جەرورتا تەڭىزى ايماعىنداعى ءبىرقاتار وڭىرلەردە اۋا تەمپەراتۋراسى +40 °C تان اسىپ، حالىقتىڭ دەنساۋلىعىنا، ەكوجۇيەگە جانە ينفراقۇرىلىمعا ايتارلىقتاي قاۋىپ ءتوندىرىپ وتىر.

قيىن جاعداي تۇركيا، گرەكيا، يتاليا، يسپانيا جانە فرانسيانىڭ وڭتۇستىگىندە بايقالىپ وتىر. كوپتەگەن اۋداندا ءورت قاۋپىنىڭ ەڭ جوعارعى دەڭگەيى جاريالانعان. توتەنشە جاعدايلار قىزمەتتەرى تاۋلىك بويى جۇمىس ىستەپ جاتىر، ءورت وشاقتارىن سوندىرۋگە قۇرلىقتاعى جانە اۋەدەگى كۇشتەرمەن قاتار ەرىكتىلەر دە تارتىلعان.

كوپتەگەن ەلدىڭ بيلىگى ازاماتتاردى قورعاۋ شارالارىن كۇشەيتتى: ورماندى ايماقتارداعى تۋريستىك باعىتتار جابىلىپ، ءورت قاۋپى جوعارى ايماقتاردا كولىك قوزعالىسى شەكتەلدى، ۋاقىتشا كومەك جانە سالقىنداتۋ بەكەتتەرى ۇيىمداستىرىلدى.

تۇرعىندار مەن تۋريستەرگە كۇن استىندا ۇزاق بولماۋعا جانە رەسمي ەسكەرتۋلەرگە قۇلاق اسۋعا شاقىردى.

كليماتولوگتاردىڭ ايتۋىنشا، مۇنداي ەكسترەمالدى اۋا رايى قۇبىلىستارى جاھاندىق كليماتتىڭ وزگەرۋىنە بايلانىستى جيىلەپ كەلەدى. ايماق ەلدەرىنىڭ بيلىگى ۇزاق مەرزىمدى بەيىمدەلۋ شارالارىن قابىلداۋعا جانە تابيعي قاۋىپسىزدىك سالاسىنداعى ىنتىماقتاستىقتى كۇشەيتۋگە شاقىرىپ وتىر.

قيىندىقتارعا قاراماستان، جەدەل ارەكەت ەتۋ، حالىقارالىق ۇيلەستىرۋ جانە ەرىكتىلەردىڭ كومەگى ءورتتىڭ تارالۋىن شەكتەۋگە جانە كەلتىرىلەتىن شىعىندى ازايتۋعا مۇمكىندىك بەرۋدە.

مامانداردىڭ ايتۋىنشا، ماۋسىم ايىندا تەمپەراتۋرا كۇرت كوتەرىلىپ، جەرورتا تەڭىزى ەلدەرىندە اۋا +40 °C تان جوعارى دەڭگەيگە جەتكەن. بۇل جاعداي ورمان جانە اۋىلشارۋاشىلىق جەرلەرىندەگى ءورت قاۋپىن كۇشەيتتى. قۇرعاق ءشوپ پەن جەلدىڭ اسەرى جالىننىڭ تەز تارالۋىنا سەپ بولدى.

تۇركيانىڭ ورمان شارۋاشىلىعى باس باسقارماسىنىڭ دەرەگىنشە، 1- 30-ماۋسىم ارالىعىندا ەلدە بارلىعى 1563 ءورت تىركەلگەن. ونىڭ ىشىندە 612 ءسى ورماندا، 951 ءى اۋىلشارۋاشىلىق القاپتارىندا بولعان. 499 ورمان ءورتى باستاپقىدا ەگىستىك جەرلەردە باستالىپ، كەيىن ورمانعا تارالعان.

1- 16-ماۋسىم ارالىعىندا، اۋا رايى ماۋسىمدىق نورما شەگىندە بولعان كەزدە، ەلدە 203 ورمان ءورتى تىركەلگەن. ال ايدىڭ ەكىنشى جارتىسىندا اپتاپ كۇشەيىپ، 409 ورمان ءورتى بولعان. تەك 27- 30 -ماۋسىم ارالىعىندا 147 ورمان جانە 195 اۋىلشارۋاشىلىق ءورتى بولعان.

بۇعان دەيىن تۇركيانىڭ بىرنەشە وڭىرىندە ورمان ءورتى سوندىرىلگەنى حابارلانعان. الايدا اۋا تەمپەراتۋراسىنىڭ جوعارى بولۋىنا بايلانىستى ءورت قاۋپى ءالى دە ساقتالىپ وتىر.