زەرتتەۋشىلەردىڭ ايتۋىنشا، توسەكتە سەگىز ساعاتتان از ۋاقىت وتكىزەتىن ءارى كۇن سايىن ءارتۇرلى ۋاقىتتا ۇيىقتايتىن ادامداردا جۇرەك-قان تامىرلارى اۋرۋلارىنىڭ اۋىر تۇرلەرىنە شالدىعۋ قاۋپى شامامەن ەكى ەسە جوعارى بولعان.
عالىمدار مۇنداي اۋىر جاعدايلارعا ارنايى مەديتسينالىق كومەك قاجەت ەتەتىن اۋرۋلاردى، سونىڭ ىشىندە ميوكارد ينفاركتىسى مەن ءينسۋلتتى جاتقىزادى.
«بۇعان دەيىنگى زەرتتەۋلەر تۇراقسىز ۇيقى رەجيمى مەن جۇرەك اۋرۋلارى قاۋپى اراسىندا بايلانىس بار ەكەنىن كورسەتكەن. ءبىراق ءبىز العاش رەت ۇيىقتاۋ ۋاقىتىنىڭ، ويانۋ ۋاقىتىنىڭ جانە ۇيقى كەزەڭىنىڭ ورتا تۇسىنىڭ وزگەرۋىن جەكە- جەكە قاراستىردىق»، - دەپ ءتۇسىندىردى وۋلۋ ۋنيۆەرسيتەتىنىڭ پوستدوكتورانتى لاۋرا ناۋحا.
زەرتتەۋ ءۇشىن عالىمدار 1966 -جىلى سولتۇستىك فينليانديادا تۋعان 3231 ادامنىڭ دەرەگىن پايدالانعان. 46 جاسىندا قاتىسۋشىلار ءبىر اپتا بويى ارنايى بەلسەندىلىك داتچيكتەرىن تاعىپ جۇرگەن. قۇرىلعى ولاردىڭ قانشا ۇيىقتاعانىن جانە توسەكتە قانشا ۋاقىت وتكىزگەنىن تىركەگەن. كەيىن زەرتتەۋشىلەر مەديتسينالىق دەرەكقورلار ارقىلى ەرىكتىلەردىڭ دەنساۋلىعىن 10 جىلدان اسا ۋاقىت باقىلاعان.
ناتيجەسىندە ءدال ۇيقىعا جاتۋ ۋاقىتىنىڭ تۇراقسىزدىعى جۇرەك-قان تامىرلارى اۋرۋلارى قاۋپىنىڭ ارتۋىمەن بايلانىستى ەكەنى انىقتالدى. ال ءارتۇرلى ۋاقىتتا ويانۋ مۇنداي بايلانىس كورسەتپەگەن.
زەرتتەۋ اۆتورلارىنىڭ ايتۋىنشا، تۇراقتى ۇيقى رەجيمى ادامنىڭ كۇندەلىكتى ءومىر ىرعاعىن كورسەتەدى جانە جۇرەك ساۋلىعىن ساقتاۋدا ماڭىزدى ءرول اتقارۋى مۇمكىن.
«ۇيقى كەستەسىن تۇراقتى ۇستاۋ - كوپشىلىگىمىز اسەر ەتە الاتىن ماڭىزدى فاكتورلاردىڭ ءبىرى»، - دەدى زەرتتەۋ اۆتورلارى.