جەردىڭ اينالۋ جىلدامدىعى ارتقان

استانا. قازاقپارات - 2025-جىلدىڭ جازىندا جەر ءوز وسىنەن اينالۋ جىلدامدىعىن ارتتىردى. سونىڭ سالدارىنان شىلدە مەن تامىز ايلارىنداعى كەيبىر كۇندەر بىرنەشە ميلليسەكۋندقا قىسقارعان، ءالى دە قىسقارادى.

بۇل تۋرالى Championat.com سايتىنا سىلتەمە جاساي وتىرىپ El.kz ينتەرنەت پورتالى حابارلايدى.

ادام مۇنداي وزگەرىستى بايقاي قويمايدى، الايدا بۇل قۇبىلىس سپۋتنيكتىك ناۆيگاتسيادان باستاپ، سيفرلىق جۇيەلەردەگى ۋاقىتتى ءدال سينحرونداۋعا دەيىنگى جوعارى دالدىك تالاپ ەتەتىن تەحنولوگيالار ءۇشىن وتە ماڭىزدى.

ا ق ش- تىڭ اسكەري-تەڭىز وبسەرۆاتورياسى مەن جەردىڭ اينالۋ قىزمەتى جونىندەگى حالىقارالىق ۇيىم 10-شىلدە كۇنى تاۋلىكتىڭ 1,34 ميلليسەكۋندقا قىسقارعانىن مالىمدەدى - بۇل بيىلعى جىلدىڭ رەكوردى. عالىمداردىڭ بولجاۋىنشا، جازدىڭ ەكىنشى جارتىسىندا كۇندەر ودان دا قىسقا بولۋى مۇمكىن.

پلانەتانىڭ اينالۋ جىلدامدىعىنا يادرو مەن مانتياداعى ماسسالاردىڭ قوزعالىسى، اتموسفەرالىق قۇبىلىستار، ايدىڭ تارتىلىس كۇشى سىندى كۇردەلى پروتسەستەر اسەر ەتەدى. عالىمداردىڭ ايتۋىنشا، سوڭعى ونجىلدىقتا اينالۋدىڭ ۇدەۋى جيىلەپ بارادى: ەگەر 1970-1990-جىلدارى تاۋلىكتەر ءجيى ۇزارسا، 2020-جىلدان بەرى قىسقا كۇندەر ءجيى كەزدەسۋدە.