جەر سىلكىنىسىنەن قابىرعالارى جارىلعان مەكتەپتىڭ وقۋشىلارى بيىل دا قاشىقتان وقي ما

قونايەۆ. KAZINFORM - الماتى وبلىسى ىلە اۋدانى بورالداي اۋىلىنىڭ تۇرعىندارى №40-مەكتەپتە جوندەۋ جۇمىستارىنىڭ اياقتالماعاىنىنا نارازىلىق ءبىلدىردى.

بورالداي اۋىلى جايناق ىقشاماۋدانىنىڭ اتا- انالارى وبلىستىق ءبىلىم باسقارماسى مەن اۋدان اكىمشىلىگىنە شاعىم ءبىلدىردى.

تۇرعىنداردىڭ ايتۋىنشا، 2016 -جىلى سالىنعان №40-مەكتەپ بيىل اقپان ايىنداعى جەر سىلكىنىسىنەن كەيىن جارامسىز بولىپ قالعان.

جەر ءدۇمپۋى كەزىندە مەكتەپ قابىرعالارى جارىلىپ، وقۋشىلار وقۋ جىلىنىڭ جارتىسىن ونلاين وقىعان.

قازىرگى ۋاقىتتا ايتىلعان مەكتەپتە جوندەۋ جۇمىستارى جۇرگىزىلىپ جاتقان جوق. بۇل جايتتى نازارعا العان اتا-انالار بالالارى جاڭا وقۋ جىلىندا ۇيدەن وقۋعا ءماجبۇر بولۋى مۇمكىن ەكەنىن ايتادى.

بۇل جاعدايعا بايلانىستى جولداعان ساۋالىمىزعا جاۋاپ بەرگەن الماتى وبلىسىنىڭ اكىمدىگى مەكتەپتە جوندەۋ جۇمىستارى باستالعانىمەن قوسىمشا قارجىلاندىرۋ سۇراتىلعاندىقتان پروتسەسس كەشىگىپ جاتقانىن حابارلادى.

- جەر سىلكىنىسىنەن كەيىن №40-مەكتەپتىڭ قابىرعالارىنداعى جارىقتاردىڭ ۇلكەيىپ كەتۋىنە بايلانىستى، ۆيزۋالدى شولۋ جاسالىپ، ناتيجەسى بويىنشا اكت تولتىرىلدى. ىلە اۋدانى اكىمدىگى جانىنان مەكتەپتىڭ جاعدايىن باعالاۋ جونىندەگى كوميسسيا قۇرىلدى. كوميسسيالىق تەكسەرۋ قورىتىندىسى بويىنشا، مەكتەپ وقۋشىلارى مەن قىزمەتكەرلەردىڭ دەنساۋلىعىنا زيان تيگىزەتىندەي زاقىم انىقتالىپ، ىلە اۋدانى اكىمىنىڭ شەشىمىمەن عيمارات اپاتتى دەپ تانىلدى. 5-ناۋرىزدان باستاپ №40-ورتا مەكتەپتە وقىتۋ فورماتى ونلاين رەجيمدە جۇرگىزىلدى. قازىرگى ۋاقىتتا قۇرىلىس-جوندەۋ جۇمىستارى باستالعان بولاتىن، الايدا قوسىمشا قارجىلاندىرۋ سۇراتىلعاندىقتان پروتسەسس كەشىگىپ جاتىر، - دەپ حابارلايدى وبلىستىق اكىمدىكتەن.

سونداي-اق الماتى وبلىسى اكىمدىگىنىڭ باسپا ءسوز قىزمەتى جاڭا وقۋ جىلى باستالعانعا دەيىن جوندەۋ جۇمىستارى اياقتالماعان جاعدايدا 1-11 سىنىپتار - باس-اياعى 1906 وقۋشى جاقىن ورنالاسقان ءبىلىم مەكەمەلەرىنە تاسىمالداپ وقىتىلاتىنىن مالىمدەدى.

اتاپ ايتقاندا، №17-ورتا مەكتەپكە - 650 وقۋشى، №54-ورتا مەكتەپكە - 380 وقۋشى، № 39-گيمنازياعا - 330 وقۋشى جانە № 42-ورتا مەكتەپكە 360 وقۋشى بولىنەدى.

ەسكە سالا كەتەيىك، بۇعان دەيىن الماتى وبلىسىندا بيىل اقپانداعى جەر سىلكىنىسىنەن 44 نىساندا جارىقشاق پايدا بولعانىن جازعان ەدىك.

ال ەڭبەكشى قازاق اۋدانىندا جاڭا سالىنعان مەكتەپتىڭ قابىرعالارى جارىلىپ كەتتى.

الماتىدا دا مەكتەپتەر مەن جاتاقحانالاردىڭ عيماراتى ءبۇلىندى.

اۆتور
دوسبول اتاجان