جەر سىلكىنىسىن الدىن الا بولجاۋ مۇمكىن ەمەس - شىڭعىس ءارىنوۆ

استانا. KAZINFORM - ەل بويىنشا سەيسميكالىق جاعداي تۇراقتى. بۇل تۋرالى بۇگىن ۇكىمەت وتىرىسىندا توتەنشە جاعدايلار ءمينيسترى شىڭعىس ءارىنوۆ ايتتى.

«كەشە بولعان جەر سىلكىنىسى بويىنشا مينيسترلىك ءبىرىنشى مينۋتتان باستاپ قاجەتتى شارالاردى ۇيلەستىردى. ازاماتتاردىڭ اراسىندا ۇرەي بولدىرماۋ ءۇشىن جەر سىلكىنىسى تۋرالى جانە ودان ارى حالىقتىڭ ارەكەتتەرى بويىنشا حاباردار ەتۋدى باستادى. سويلەۋ دابىلى، سيرەنا جانە جەرگىلىكتى وبەكتىلەر جۇيەسى تارتىلىپ، تەلەراديو كانالدارى ارقىلى جەتكىزدىك. رەسپۋبليكالىق جانە وڭىرلىك جەدەل شتابتار اشىلىپ، 386 ازاماتتاردى قابىلداۋ پۋنكتى ۇيىمداستىرىلدى. تاۋلىك بويى جەدەل جەلى جۇمىس ىستەپ تۇر. كەشە قابىلداۋ قابىلداۋ پۋنكتتەرىندە ءۇش مىڭعا جۋىق ادام ورنالاستى. ونىڭ ىشىندە 906 بالا بار. اكىمدىكتەر قيراعان عيماراتتاردى انىقتاۋ بويىنشا تەكسەرۋدى جالعاستىرىپ جاتىر»، - دەدى مينيستر.

ونىڭ ايتۋىنشا، سونىمەن قاتار مينيسترلىكتىڭ اۋە كەمەسىمەن سەل قاۋپى بار اۋماقتاردا اەروۆيزۋالدى زەرتتەۋ جۇرگىزىلدى.

الگوريتمگە سايكەس قوعامدىق ءتارتىپتى قامتاماسىز ەتۋ ءۇشىن پوليتسيا قىزمەتكەرلەرى تارتىلدى.

قازىرگى ۋاقىتتا الماتى قالاسى بويىنشا بارلىق تىرشىلىكتى قامتاماسىز ەتۋ نىساندارى شتاتتىق رەجيمدە جۇمىس ىستەۋدە.

«جەر سىلكىنىسى كەز كەلگەن توتەنشە جاعداي سياقتى الدىن الا بولجاۋ مۇمكىن ەمەس. وسىعان بايلانىستى مينيسترلىك ولاردىڭ الدىن الۋ جانە حالىقتى ءبىرىنشى كەزەكتى ارەكەتتەرگە دايىنداۋ بويىنشا جۇمىس جۇرگىزۋدە. 20-اقپاننان باستاپ الماتىدا ازاماتتاردى توتەنشە جاعدايلارعا دايىنداۋ ءۇشىن مينيسترلىكتىڭ باستىقتارى قاتارىنان جەدەل توپ جۇمىس ىستەۋدە. وسى قىسقا مەرزىم ىشىندە جەر سىلكىنىسى كەزىندە ازاماتتاردىڭ ءىس-قيمىلى تۋرالى اۋقىمدى اقپاراتتاندىرۋ جانە ءتۇسىندىرۋ جۇمىسى جۇرگىزىلدى. ول ءوز ناتيجەسىن كورسەتتى. بۇل جولى حالىقتىڭ كوپ بولىگى ۇرەيگە ۇشىراعان جوق. جەدەل توپ 8 مىڭعا جۋىق اۋلانى ارالاپ، ءبىلىم بەرۋ نىساندارىندا 650-دەن استام ساباق وتكىزدى جانە ادامدار كوپ جينالاتىن ورىنداردا ءتۇسىندىرۋ جۇمىستارى مەن ەسكەرتپەلەر تاراتتى. كەشە مەنىڭ بۇيرىعىممەن حالىقتى وقىتۋ جانە جەر سىلكىنىسى كەزىندە پراكتيكالىق ارەكەتتەردى پىسىقتاۋ ءۇشىن قوسىمشا الماتىعا ۇزىناعاشتان اسكەري قىزمەتشىلەر جىبەرىلدى. قازىرگى ۋاقىتتا ەل بويىنشا سەيسميكالىق جاعداي تۇراقتى»، - دەدى شىڭعىس ءارىنوۆ.

اۆتور

مارلان جيەمباي