جەر قويناۋىن پايدالانۋشىلار وتاندىق تاۋارلاردى ساتىپ الۋعا باسىمدىق بەرەتىن بولادى
استانا. KAZINFORM - جەر قويناۋىن پايدالانۋشى وتاندىق تاۋارلاردى ساتىپ الۋعا باسىمدىق بەرەتىن ەلىشىلىك قۇندىلىقتى دامىتۋ باعدارلاماسىن قابىلداندى. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ايتتى.
«مەملەكەت باسشىسى 3 جىل ىشىندە جەر قويناۋىن پايدالانۋشى كومپانيالاردىڭ، كۆازيمەملەكەتتىك جانە مەملەكەتتىك سەكتوردىڭ ساتىپ الۋ سالاسىنداعى جەرگىلىكتى ونىمدەر مەن قىزمەتتەردىڭ ۇلەسىن 60 پايىزعا جەتكىزۋدى تاپسىردى. اتالعان مىندەتتى ىسكە اسىرۋ وتاندىق وندىرۋشىلەردى تاپسىرىستارمەن قامتاماسىز ەتۋگە، ولاردىڭ ىسكەرلىك بەلسەندىلىگىن ارتتىرۋعا مۇمكىندىك بەرەدى. بۇل ىشكى ءوندىرىستى دامىتۋ ءۇشىن وتە ۇلكەن رەزەرۆ ەكەنى انىق»، - دەدى ۇكىمەت باسشىسى.
ونىڭ اتاپ وتۋىنشە، قازىر كوپتەگەن ەل، ونىڭ ىشىندە ەكونوميكاسى قارقىندى دامىعان مەملەكەتتەردىڭ وزدەرى ىشكى نارىقتى قولداۋ جانە قورعاۋ ساياساتىن بەلسەندى جۇرگىزىپ كەلەدى.
«حالىقارالىق ۆاليۋتا قورى مۇنداي قورعاۋ شارالارىنىڭ جارتىسىنا جۋىعى قىتاي، ەۋروپالىق وداق جانە اقش ەكونوميكالارىنا تيەسىلى ەكەنىن اتاپ كورسەتتى. ولار يمپورتتىق تاۋارلاردىڭ ۇلەسىن تومەندەتە وتىرىپ، ءوز وندىرۋشىلەرىن قولداۋ شارالارىن كەڭىنەن قولدانۋدا. قازاقستان دا ەكونوميكانى نىعايتۋعا، ونىڭ ىشىندە وتاندىق ءوندىرىستى قولداي وتىرىپ، دامىتۋعا نيەتتى. وسىنداي اۋقىمدى مىندەتتى شەشۋ ءۇشىن ساتىپ الۋ راسىمدەرىن جۇرگىزۋ كەزىندەگى تالاپتاردى قاتاڭداتاتىن زاڭنامالىق نورمالار قابىلداندى. ساتىپ الۋ سالاسىن باقىلاۋدى ودان ءارى كۇشەيتۋدى كوزدەيتىن تۇزەتۋلەر ماجىلىسكە ەنگىزىلدى. ءاربىر جەر قويناۋىن پايدالانۋشى وتاندىق تاۋارلاردى ساتىپ الۋعا باسىمدىق بەرەتىن ەلىشىلىك قۇندىلىقتى دامىتۋ باعدارلاماسىن قابىلدايتىن بولادى»، - دەدى ولجاس بەكتەنوۆ.
اۆتور
مارلان جيەمباي