«جەر الىپ بەرەمىن» دەپ ادامداردى الداعان 62 جاستاعى ايەل ۇستالدى
22:05, 23 - ءساۋىر 2025
قونايەۆ. KAZINFORM - الماتى وبلىسى ەڭبەكشىقازاق اۋدانىندا پوليتسيا «الاياقتىق» بابى بويىنشا ءىس قوزعادى.
الماتى وبلىسى پوليتسيا دەپارتامەنتىنىڭ مالىمەتىنشە، 62 جاستاعى ايەل «جەر تەلىمىن راسىمدەۋگە كومەكتەسەمىن» دەپ، ادامداردان اقشا العان. كەيبىر تۇرعىنداردان 45 مىڭ تەڭگە، ال بىرەۋىنەن 200 مىڭ تەڭگە العان. قازىردىڭ وزىندە 29 جابىرلەنۋشى انىقتالدى. پوليتسەيلەر بۇل سان ءالى دە ءوسۋى مۇمكىن دەپ وتىر.
- قازىرگى ۋاقىتتا كۇدىكتىگە قاتىستى «الاياقتىق» بابى بويىنشا قىلمىستىق ءىس قوزعالدى. تەرگەۋشىلەر دالەلدەردى مۇقيات جيناپ، بارلىق جابىرلەنۋشىلەردى انىقتاۋمەن قاتار، ونىڭ باسقا دا قىلمىستىق ارەكەتتەرگە قاتىسى بار-جوعىن تەكسەرىپ جاتىر، - دەپ مالىمدەدى دەپارتامەنتتەن.