جەنيەۆادا يران مەن ەۋروپا ەلدەرى اراسىنداعى كەلىسسوز باستالدى

استانا. KAZINFORM - يراننىڭ سىرتقى ىستەر ءمينيسترى ابباس ەۋرووداق ديپلوماتتارىمەن كەلىسسوز جۇرگىزۋ ءۇشىن جەنيەۆاعا كەلدى، الايدا يزرايل شابۋىلدى توقتاتپايىنشا، يران ديالوگقا دايىن ەمەس ەكەنىن مالىمدەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

يران مەن ەۋروپا ەلدەرى اسكەري قاقتىعىس باستالعاننان بەرى العاش رەت تىكەلەي بايلانىس ورناتتى. جۇما كۇنى جەنيەۆاعا يراننىڭ سىرتقى ىستەر ءمينيسترى ابباس اراكچي كەلىپ، ۇلى بريتانيا، گەرمانيا، فرانسيا سىرتقى ىستەر مينيسترلەرىمەن جانە ەو - نىڭ سىرتقى ساياسات جانە قاۋىپسىزدىك جونىندەگى جوعارعى وكىلىمەن كەزدەستى.

- ءبىز مۇندا تالقىلاۋ ءۇشىن ەمەس، تىڭداۋ ءۇشىن كەلدىك، - دەدى ابباس اراكچي.

كەلىسسوز قارساڭىندا يراندىق مينيستر مەملەكەتتىك تەلەارناعا سۇحبات بەرىپ، كەزدەسۋگە قاتىساتىنىن راستادى، ءبىراق تەگەران شابۋىل جالعاسقان جاعدايدا كەلىسسوز جۇرگىزۋگە نيەتتى ەمەس ەكەنىن ايتتى.

- امەريكالىقتار كەلىسسوزگە نيەتتى ەكەنىن بىرنەشە رەت ءبىلدىردى، ءبىراق ءبىز ۇستانىمىزدى اشىق جەتكىزدىك، اگرەسسيا جالعاسىپ جاتقاندا، ديالوگ مۇمكىن ەمەس. ءبىز بۇل قىلمىسقا سەرىكتەس بولعان ا ق ش- پەن كەلىسسوز جۇرگىزبەيمىز، - دەيدى ا. اراكچي.

مينيستر جەنيەۆاعا ەۋروپالىقتاردىڭ ۇسىنىسىن تىڭداۋ ءۇشىن كەلگەن، الايدا «يزرايل اسكەرى يرانعا سوققى بەرىپ جاتقاندا ەشقانداي كەلىسسوز تۋرالى ءسوز بولۋى مۇمكىن ەمەس»، - دەپ وتىر.

سونىمەن قاتار، تەگەران ديپلوماتيالىق ارنانى مۇلدە جابۋعا تىرىسپايدى، رەسمي وكىلدەر يراننىڭ بولاشاقتا ديالوگقا قايتا ورالۋ مۇمكىندىگىن ساقتاپ وتىرعانىن اتاپ ءوتتى.

ەۋروپا ديپلوماتياسى «تەرەزەنى» پايدالانۋعا تىرىسىپ جاتىر

جەنيەۆاداعى كەزدەسۋ - باتىس ەلدەرىنىڭ جالعاسىپ جاتقان قاقتىعىس اياسىندا ديپلوماتيالىق پروتسەستى قايتا جانداندىرۋعا العاشقى تالپىنىسى.

كەزدەسۋگە ۇلى بريتانيا، فرانسيا جانە گەرمانيا سىرتقى ىستەر مينيسترلەرى، سونداي-اق ەۋروپالىق وداقتىڭ سىرتقى ساياسات جانە قاۋىپسىزدىك جونىندەگى جوعارعى وكىلى كايا كاللاس قاتىستى.

ۇلى بريتانيانىڭ سىرتقى ىستەر ءمينيسترى دەۆيد لەمميدىڭ ايتۋىنشا، قازىرگى جاعدايدىڭ ۋشىعۋىنا جول بەرمەيتىن مۇمكىندىكتەر بار.

- قازىر مۇمكىن، بار بولعانى ەكى اپتاعا عانا سوزىلاتىن ديپلوماتيالىق شەشىمگە قول جەتكىزۋگە ارنالعان مۇمكىندىك بار، - دەدى ول ۇلى بريتانيا سىرتقى ىستەر مينيسترلىگى جاريالاعان مالىمدەمەدە.

جەنيەۆاعا ساپار الدىندا لەممي ۆاشينگتوندا ا ق ش مەملەكەتتىك حاتشىسى ماركو رۋبيومەن جانە اق ءۇيدىڭ ارنايى وكىلى ستيۆ ۋيتكوففپەن كەلىسسوز جۇرگىزدى. كەزدەسۋ بارىسىندا قاقتىعىستى تەجەۋ ارەكەتتەرى، يراننىڭ يادرولىق باعدارلاماسى جانە ا ق ش-تىڭ يزرايل اسكەري كامپانياسىنا ارالاسۋ ىقتيمالدىعى تالقىلاندى.

- تاياۋ شىعىستاعى جاعداي ءالى دە اسا قاۋىپتى بولىپ وتىر. ءبىز يراننىڭ يادرولىق قارۋعا قول جەتكىزۋىنە جول بەرمەۋگە تولىق بەل بايلادىق، - دەپ مالىمدەدى لەممي.

ترامپ ويلانۋعا ەكى اپتا ۋاقىت بەردى

اق ءۇيدىڭ رەسمي وكىلى كەرولاين ليەۆيت بەيسەنبى كۇنى ا ق ش پرەزيدەنتى دونالد ترامپتىڭ مالىمدەمەسىن وقىپ بەردى. مالىمدەمەدە الداعى ەكى اپتا ىشىندە ا ق ش- تىڭ يرانعا قارسى يزرايلدىڭ اسكەري ارەكەتتەرىنە قاتىسۋى تۋرالى شەشىم قابىلداناتىنى ايتىلعان.

- يرانمەن الداعى ۋاقىتتا ماڭىزدى كەلىسسوز ءوتۋى مۇمكىن دەگەن ايتارلىقتاي ىقتيمالدىقتى ەسكەرە وتىرىپ، مەن كەلەسى ەكى اپتا ىشىندە بۇل اسكەري ءىس-قيمىلعا قاتىسامىن با، جوق پا، شەشىم قابىلدايمىن، - دەلىنگەن اق ءۇي تاراتقان مالىمدەمەدە.

ەۋروپالىق ديپلوماتتار سول ەكى اپتانى ديپلوماتيالىق رەتتەۋگە قول جەتكىزۋگە تىرىساتىن شەشۋشى كەزەڭ رەتىندە قاراستىرىپ وتىر.

تاۋەكەل، ءۇمىت پەن شىنايىلىق

جەنيەۆاداعى كەزدەسۋ ايماقتا اشىق قاقتىعىس قاۋپى ارتىپ كەلە جاتقان جاعدايدا ءوتىپ وتىر. شەنەۋنىكتەردىڭ ايتۋىنشا، اتالعان كەلىسسوز كەلەسى اپتادا گااگادا وتەتىن ناتو كوشباسشىلارىنىڭ سامميتى قارساڭىندا ديپلوماتيالىق سەرپىن قالىپتاستىرۋعا باعىتتالعان. سامميتتىڭ كۇن تارتىبىندە تاياۋ شىعىستاعى قاۋىپسىزدىككە قاتىستى كەڭ اۋقىمدى تالقىلاۋ جوسپارلانعان.

ايتا كەتەيىك، ب ۇ ۇ قاۋىپسىزدىك كەڭەسى 20 -ماۋسىمدا تاياۋ شىعىس پەن ۋكرايناعا قاتىستى ەكى وتىرىس وتكىزەدى.

ەۋرووداق تاياۋ شىعىستان ءوز ازاماتتارىن ەۆاكۋاتسيالاۋ ءۇشىن ازاماتتىق قورعانىس مەحانيزمىن ىسكە قوستى.

اۆتور

داۋلەت ىزتىلەۋ