جۇمىسىن توقتاتقان كاسىپكەرلەر دە دەكلاراتسيا تاپسىرۋى كەرەك – م ك ك

جۇمىس ىستەمەي تۇرعان جانە جۇمىسىن توقتاتقان كاسىپكەرلەر دە دەكلاراتسيا تاپسىرۋى كەرەك. بۇل تۋرالى مەملەكەتتىك كىرىستەر كوميتەتى وندىرىستىك ەمەس تولەمدەردى، جەكە تۇلعالاردى جانە ارناۋلى سالىقتىق رەجيمدەردى اكىمشىلەۋ دەپارتامەنتىنىڭ ديرەكتور نۇرجان قۋاندىقوۆ ايتتى، دەپ حابارلايدى Kazinform.

«2021-جىلدىڭ 1- قاڭتارىنان باستاپ «كىرىس» تۋرالى دەكلاراتسيانى مەملەكەتتىك قىزمەتشىلەر مەن ولارعا تەڭەستىرىلگەن ادامدار، سونداي-اق ولاردىڭ جۇبايلارى - شامامەن 580 مىڭ جەكە تۇلعا تاپسىرعان. ەكىنشى كەزەڭدە وسى جىلى كۆازيمەملەكەتتىك سەكتوردىڭ مەملەكەتتىك مەكەمەلەرىنىڭ قىزمەتكەرلەرى، سونداي-اق ولاردىڭ جۇبايلارى شامامەن 2,1 ميلليون ادامدى قۇرادى. ءۇشىنشى كەزەڭدە 2024-جىلعى 1- قاڭتاردان باستاپ دەكلاراتسيانى زاڭدى تۇلعالاردىڭ قۇرىلتايشىلارى (قاتىسۋشىلارى) ، جەكە كاسىپكەرلەردىڭ باسشىلارى، سونداي-اق ولاردىڭ جۇبايلارى (زايىبى) تاپسىرادى. شامامەن 3,9 ميلليون ادام جوسپارلانعان»، - دەدى ول.

دەپارتامەنت ديرەكتورىنىڭ اتاپ وتۋىنشە، ءتورتىنشى كەزەڭدە 2025-جىلعى 1- قاڭتاردان باستاپ ازاماتتاردىڭ باسقا ساناتتارى تاپسىراتىن بولادى. ولار - 6,9 ميلليون ادام. 2025-جىلى 13 ميلليوننان استام جەكە تۇلعانى قامتۋ جوسپارلانعان.

«كەلەسى جىلى بيزنەسمەندەر جەكە مۇلىكتەرىن جاريالايتىنىن ەسكەرە وتىرىپ، وسى ساناتتاعى دەكلارانتتارعا نازار اۋدارعىم كەلەدى. ولار - جەكە كاسىپكەرلەر، ءبىرىنشى باسشىلار، قۇرىلتايشىلار، زاڭدى تۇلعالاردىڭ قاتىسۋشىلارى. جۇمىس ىستەمەي تۇرعان جانە جۇمىسىن توقتاتقان كاسىپكەرلەر دە دەكلاراتسيا تاپسىرۋى كەرەك. الايدا، فيليالدار مەن وكىلدىكتەردىڭ باسشىلارى زاڭدى تۇلعا بولىپ تابىلمايتىندىقتان، دەكلاراتسيا تاپسىرۋعا مىندەتتى ەمەس»، - دەدى نۇرجان قۋاندىقوۆ.